Matai ni koula o Sani Fine

Update: 11:20AM NODA Railesu e na macawa oqo, eda na wilika tiko yani kina na kedra i tukutuku e so na noda dau qito ka ra sa valataki Viti oti e na Commenwealth Games ka dau vakayacori e na veiya va na yabaki.

Ni tei raica sara mada na i tukutuku ka a tabaki e na Na i Lalakai e na yabaki 1982:

�Na noqu sega ni galeleta na sarasara wavoki mai Gold Coast, Ositerelia e na yakavi ni Vakaraubuka, au sa mai tauca kina na vuana e na noqu winitaka nai matai ni koula nei Viti ena sotasota ni Commenwealth Games ka a vakayacori mai Brisbane, Ositerelia e na yabaki 1982�.

Oqori na veika e cauraka tiko ki na noda niusiveva oqo na i Taukei, o Sani Fine Vea, ka a matataki Viti e na  veivacu e na i vakatagedegede ni light- heavyweight  ka matataki Viti kina.

E vakamacalataka o Fine ni siga Vakaraubuka era a sureti kina na lewe ni timi ni Viti me ra la�ki sarasara ki Gold Coast, sa qai nanuma o koya me kerei Ignesio Mow e dua talega na cauravou ka rau lewe ni kalavo vata e na Montfort Boxing Club, ke rau rawa mada ni la�ki vakaukauwa yago e na vanua era dau tereni kina na dauveivacu.

Tukuni ni vanua sara ga o ya e qai la�ki siviraki Fine kina o Mow e na i walewale kece ni vacu leleka kei na i vacu me se tadodo tu ga sa calidi, na i vacu ka dau tukuni tu na sega na tatau, na i vacu bati ni siwa kei na veimataqali leve me rawa ni rawata kina na qaqa.

E talanoataki tiko ni rau qai sota ko Fine kei na dua na turaga ni Zambia mai Aferika, yacana o Joseph Poto, e na fainala e na i vakatagedegede oya, ka dalasai kina na turaga yago loaloa oqo.

E bau dredre toka na i matai ni wabvoki e na nodrau veisoli i vacu na turaga e rua oqo, ka rau vakacowiri taka na rigi e na vuqa sara na gauna.

Na i matai ni rua na miniti e vaka e lewa vakavinaka sara tu ga o Fine na buturara ni veivacu e na i vacu bi e sorova toka vei Poto me yacova ni sa qiri na lali e na i otioti ni sekodi.

Na gauna ga ni vakacagicagi, sa tukuna kina o Mow vei Fine me yawaki Poto vakalailai, baleta ni balavu toka vei rau e na vica na idi.

Ni se qai taqiri ga na lali e na i ka rua ni wavoki, sa kocovi Fine sara ga yani o Poto e na i matau kei na i mawi, ka ra qai kidacala ga na sarasara ni sa qiqica na fuloa ni rigi o Poto ka sega ni rogoca tale e dua na ka, e na i teke ni ose e rubilaka o Fine e na ligana i matau.

Na nona dodosasa tu oqo e loma ni rigi o Poto, e qai vakilai koya ga mai ni sa lausui e na dua na vokete wai batabata, ka ra kidacala na nona sala ni dra, ka vakavuna na nona qai rai yani ni sa laveti tu na ligai Fine, ka ni sa nona na qaqa kei na i matai ni metali koula me rawata o Viti.

Na gauna sa lesu mai kina na timi ni Viti e na macawa sa oti, e ratou sa qai la�ki kanavata kina ki na nona vale mai Navua o Fine, Mow, ratou na nona veitinani kei Father Brian Wilson, na dau ni veiterenitaki ni Montfort Boxing Club.

E marautaka sara vakalevu na qaqa nei Fine o Father Wilson, ka tukuna ni vuna e matataki Viti kina ki na Commenwealth Games o koya, baleta ni nona matanitu (Tonga) e se vakavakarautaka tiko na vakacaca ni cagilaba, ka sega ni levu sara na nona i lavo me sauma kina na nona i vodovodo ki Ositerelia.

Ia, e ratou sa yalataka na matanitu o Tonga ni sa tu vakarau me na sauma na i vodovodo nei Fine ki na valataki vanua ka tarava, se e vei na yasai vuravura cava ga e na vakayacori kina. 

More Stories