Marautaki na vinaka ni sala e Namosi

Update: 9:56AM ERA sa marau na i taukei ni lori, vakabibi na draiva ni keria kei ira na saravanua era dau vakayagataka vakawasoma na Nabukelevu Rd ni sa mai tekivutaki tiko na kena vakavinakataki mai vei iratou na kabani na Fulton Hogan Hiways ( FHH).

Esa dua na vakacegu levu talega vei ira e 500 na lewenivanua mai na koro o Nabukelevu e Namosi kei ira talega na dau vakayagataka na bisinisi ni saravanua ni oti na kena mai vakavinakataki e 43 na kilomita na tolo ni gaunisala oqo.

E a soli na konitaraki ni cakacaka oqo ki na kabani na Fulton Hogan Hiways (FHH), ena vuku ni kena qaravi na gaunisala ena wasewase e loma, Vualiku kei na Tokalau.

Na vakavinakataki ni gaunisala oqo e tekivu mai ena i gole ni sala, ka gole cake sara ki na koro o Nabukelevu.

Tukuna na vakailesilesi liu ni FHH mai Taunovo o Remesio Naqoro ni sa qaravi oti tiko e 10.2 na kilomita, oya na kena vakavinakataki na gaunisala me dakoba, caka vinaka ni vakataniwai.

Tukuna e dua na turaga ka draiva ni keria e Nabukelevu, o Joji Nakou ni sa dua na vakacegu levu vei ira na draiva ni sa vaka tu oqo na i tuvaki ni gaunisala vei ira.

�Na cicivaki ni tamata tauvimate bibi mai nakoro ki na Korovisilou Health Centre se ki Navua sara e sa vakarawarawataki vakalevu ka totolo talega,� e kuria o Nakou. 

Era kila vinaka na draiva kei na I taukei ni keria na kena dau lolobo ena soso na taya ni lori ni dau taubi na uca.

Esa dau vakadredretaka saraga na nodra veilakoyaki ke ca tu na gaunisala ena draki suasua vakaoqo.

Tukuna o Patrick Keenan, vakailesilesi liu mai na FHH ni tomana tikoga oqo na kabani na tatadra ni matanitu, oya na kena vakavinakataki na nodra bula na lewenivanua era tu ena taudaku ni koro lelevu.

Vakauasivi na nodra sala ni veilakoyaki.

E na namaki tiko me na vakacavari na cakacaka oqo e Nabukelevu Rd e Namosi ena vula oqo o Jiulai.

More Stories