Marautaki na valenibula ni ivi

E MARAUTAKA na Matabose ni Dauvolivoli na kena varau dola vou e dua na vale ni veiqaravi vei ira na vakaleqai na nodra Ivi se na Kidney Dialysis Centre mai Lautoka ka ratou dolava na soqosoqo na Island Kidney Assistance Foundation Fiji (IKAFF).

Na kena varau dola vou na vale ni veiqaravi qo e kani marau vei ira era na lewe ni vanua ka ra tiko e Viti Levu ka ra gadreva tu na veiqaravi ni dialysis. Qo e kenai balebale talega ni ra na sauma nai sau lailai duadua na lewe ni vanua ni vakatauvatataki qo kei rau na vale ni veiqaravi e rua na Kidney Foundation of Fiji (KFoF) kei na Zen’s Medical Centre.

Era dau sauma tiko na tiko e Viti Levu e $250 e dua na veiqaravi ia na IKAFF e ratou na lavaka ga e $150 dua na veiqaravi ka na veiqaravi sau lailai duadua e Viti Levu. E laurai talega ni ratou lavaka talega na Northern Dialysis Centre e $150 dua na veiqaravi.

Ia e laurai tiko ni ratou na rawa ni vakalutu ka talega nai sau ni nodratou veiqaravi na soqosoqo levu na Kidney Foundation of Fiji.

Na kena tauyavutaki vou na IKAFF e sega ni dua na veivuke mai na Matanitu ka tiko na lomatarotaro e cava rau sega ni rawa ni vakalutua nai sau ni veiqaravi mai na $250 kina $150 na vale ni veiqaravi e rua.

Sa vakanuinui tiko na Matabose ni dauvolivoli ni kena curu mai na IKAFF kina na makete ena rawa ni veivakauqeti vei rau na vale ni veiqaravi e rua na kena rawa ni vakalutu ki na sau ni veiqaravi ni dialysis.

E sa mai ciqoma e vuqa na kudru mai vei ira na lewe ni vanua na Matabose ni Dauvolivoli ena vuku ni sau levu ni veiqaravi ni dialysis.

Vei ira era vakaleqai na nodra Ivi kei ira na nodra vuvale era sa dau sotava na dredre ni kena saumi na veiqaravi qo, ka gadrevi kina me so na dau ni veiqaravi vou me ra curu mai kina makete me rawa ni soli vei ira na lewe ni vanua na digidigi me ra digitaka na veiqaravi ka veirau kei na kenai sau.

More Stories