Marautaki na tawase ni yabaki

E I vakaraitaki ni na dua na yabaki vinaka na yabaki qo ena kena tau na uca ena gauna e mai veitalatala kina na yabaki 2017 me tadolavi yani na yabaki 2018.

Era vakadinadinataka e levu na veiyasai Viti na kena mai mimiri na uca ena bogi ni Siga Tabu nai ka 31 ni Tiseba 2017 me tekivutaki yani na i matai ni siga ni Janueri 2018.

E vakaraitaka ko Sinima Wainiqolo ena koro ko Sawana mai Vanuabalavu esa dua na ka na domo ni kaikaila kei na lagalagasere ena nodra marautaka na kena sa mai tawase na yabaki.

?E tau tu ga na lagi ena gauna sa mai tawase kina na yabaki ia e sega ni vakataotaka na nodra sa lagalaga sere kei na qiri kapa na gone ni Sawana,? e kaya o Wainiqolo.

E kuria na marama yabaki 70 qo ni sega vakadua ni moce ena gauna era sa kidavaka kina na koro vakatoga qo ko Sawana na yabaki vou ka vakila talega o koya na levu ni nodra marau na lewenivanua kei ira na vulagi era vakadinadinataka tiko na marautaki ni tawase ni yabaki e yanuyanu.

?E bau mai marau vata tale tikoga kei keimami ko Waisake Naholo na cauravou ni Nadroga ka qito tiko ena timi ni Niu Siladi,? e kaya o Wainiqolo.

E tomana ni sega ni taqei rawa na levu ni kakana kei na kena i coi ena nodra vakatakakana voli ena toba ko Lomaloma ka ra yacoyaco yani ena toba na veikorokoro ena yanuyanu ko Vanuabalavu ka lako vata na nodra qiri kava.

Ia, e na loma ni koro vakaturaga e Serea e vakaraitaka ko Akuila Tuinasau ni dua na ka na levu ni marau ena nodra mai sogota vakatabacakacaka na yabaki 2017 ena nodra kidava na yabaki 2018.

?Keimami tara vakatunuloa ena neimami dui tikotiko ena neimami marautaka tiko na yabaki vou, e lagilagi dina ni mimiri na kena uca ka keimami vakanuinui tu e Serea ni na dua na yabaki vinaka na yabaki qo,? e kaya o Tuinasau.

E kaya ni sega madaga ni dua na vakasausa, era lagalaga sere na cauravou ka ra soso yaqona na veituraga kei na vei marama ena nodra dui vakatunuloa.

Ena veivanua ni vakatakakana ena veiyasai Viti era tawana na lewenivanua ena nodra la?ki marautaka vakavuvale, vakamataqali, vakoro na kena tawase na yabaki.

Ia, ena baravi kei Saweni mai Lautoka e ra osota na duikaikai ena nodra kauta vata yani na kedra ivakasigalevu me ra la?ki marautaka vata na nodra cabeta bula tale e dua na yabaki vou.

E vakaraitaka e dua na turaga ni Idia ko Jadhu Ram ka vakaitikotiko e Lautoka ni dau i vakarau tu ni nodratou marautaka vakavuvale ni cava e dua na yabaki me ratou dau la?ki vakatakakana vakavuvale ena baravi mai Saweni.

E na baravi kei Deuba me yacova sara yani na veibaravi kei Serua kei Nadroga era tawana yani na lewenivanua ena i matai ni siga ena nodra marautaka vata na tawase ni yabaki.

Ia, e na koro ko Nacokaika, Naitasiri era a tausoli kina na goneyalewa kei ira na cauravou ena nodra vakarautaka tale e dua na i tuvatuva ni nodra sasaga yaga ena loma ni yabaki qo.

E vakaraitaka ko Asesela Nalago na turaganikoro mai Toge ena yasana o Ba ni dua na ka na nodra marautaka na tawase ni yabaki ka tekivu saraga vakamataka lailai na veisui ka lako vata kei na vude ena veiyakavi ena loma ni koro ena kena veivatuloa.

More Stories