Marautaki na soqo ni i Vola Tabu ni oti e 50 na yabaki

E MAI marautaki ena mua ni macawa sa oti na Macawa ni Vola Tabu ka vakayacori vata kei na soqo eso me rawa ni kilai kina na macawa oqo.

 E dina ni draki suasua ena siga Vakarauwai, ia e sega ni vakataotaka na kena caka na soqo oqo.

Ka ratou marautaka talega na i soqosoqo ni i Vola Tabu ena Ceva ni Pasifika na i ka 50 ni yabaki ni nodratou mai tauyavu.

E a vakayacori e dua na tayabe e Suva, ka mai dua na kena soqo ena rara na Sukuna Park  ka rauta ni 300 na lewenivanua era mai tiko ena soqo oqo.

 Na kena mai vakananumi na macawa ni i Vola Tabu e mai vakabibitaki ga kina na noda wilika na Vosa ni Kalou.

  E rauta ni 100,000 na i Vola Tabu e dau veisoliyaki ena veiyabaki mai vei ratou na soqsoqo oqo na Bibel Society of the South Pacific.

 E sa vica talega na i vola e tabaki mai na tabana qo, ka volai ena vosa ni vanua e Viti kei na Pasifika.

 Tukuna  o Solomoni Duru, na i vakailesilesi liu ni tabana oqo ni tikoga na gagadre mai vei ira na lewenivanua ena kena wiliki na Vosa ni Kalou.

  E kaya talega o Duru ni sa tiko na nodratou i tavi oya me ra na dau vakabibitaka o ira na lotu va- Karisito na kena wiliki ena veisiga na Vosa ni Kalou, ka me na vakadeitaki kina na bula kei na yavu dina ni bula va- Kalou.

 E sa tiko talega na veigacagaca ni komupiuta ena noda vanua ka sa tu kina na i Vola Tabu, mai na noda wilika na i vola, ka sa tu talega na bolebole ni tabana oqo ena kena votai ka veisoliyaki na  i Vola Tabu ki vei ira era gadreva me ra wilika.

More Stories