Mai Varanise ki Toga

ERATOU a osota toka yani na olo ni Vale ni Lotu Katolika ka toka volekata na makete mai Nausori na mataqali o Naivibale, Waisousou kei Vunivaivai e na mataka ni Vukelulu, e na macawa sa oti e na soqo namaki ni kau matanigone mai vei iratou na wekadratou mai Nailagolaba.

Na vuna e la’ki vakayacori kina na soqo lagilagi e na olo ni Lotu Katolika mai Nausori, o ya ni vakatatabu tiko na vanua o Toga Naqavoka e na nodra bale na Gone Turaga na Roko Tui Toga, ka qai tara sara tiko ga na veika kece ka a vakatabui tu mai e na Vakaraubuka ni macawa qo.

Na gauna e ra se bera tiko mai kina na vulagi, era a gunu yaqona tiko na turaga ni Naqavoka e na nodra waraka toka na nodratou vasu mai Nailagolaba.

Ni qai 11 donu na kaloko e na mataka lailai ni siga o ya, e ratou sa vakatamatama yani na nona mataqali o Ratu Malakai Bakaniceva e na nodratou sa curu yani e na vanua ni soqo.

Na gauna ga e sa vakacabori oti kina na veisevusevuti mai na yasana ruarua, ratou sa gole cake sara na budratou na gone mai Naqavoka e na i dabedabe e sa vakarautaki koto me ratou la’ki waraki iratou mai kina na makubudratou ka ra gole tiko mai Varanise.

E a qito rakavi tiko mai Varanise na cauravou vasu ni Ucunivanua oqo, mai semata tale yani na nona sui ni sarisari e na mataqali ko Naivibale, ka rau sa la’ki vakaitikotiko tudei mai Varanise me yacova mai nikua.

E tolu tiko na luvedrau na veiwatini oqo, qase duadua o Adi Arieta Radikedike, tarava o Ratu Jaden Emmanuel ka gone duadua o Ratu Malakai Jethro.

Sa vakaciriloloma dina na veivosa ni tubetube kece e vakayacori tiko e na siga o ya mai na yasa ni veiwekani ruarua, ka ni sa oti vakavinaka oqo e va na yabaki e sa qai kau mai kina na matadratou na gone mai Nailagolaba ki na nodratou koro ni vasu.

Ni sa kau oti na matadratou na gone mai Nailagolaba vei iratou na dui budratou, e sa qai tuberi tale e dua na kamunaga mai vei iratou na koro ko ni vasu me i vono ni yau levu e ratou kau mai kina na gone, ka i vakaraitaki talega ni dua na magiti e ratou sa vakarautaka toka yani na koro ni vasu me kedra i waraki na vulagi e ra yaco tiko yani e na siga sa lokuci.

Ni sa oti kece na veiqaraqaravi vakavanua, e sa qai mai carubi yani e dua na mata gunu yaqona vakaivua, ka vakakina na kena vakayagataki na i vakasigalevu totoka e ratou sa vakarautaka toka yani na koro ni vasu.

Na gauna e caka tiko kina na vakasigalevu eratou sa qai gole yani na vasu ki vei ira na veiwekani mai Naqavoka, ka veireguci vinaka na loloma, ka veisemati talega kina vakavinaka na dra.

E na nodratou sega ni bau rere vakalailai na gone e na kena sa bubuci na baludratou mai nai regu vei ira na buinigone ni Naivibale. Toso tiko na gunu yaqona kei na veiwali, ni bera ni ratou qai tubera tale mai e dua na kamunaga me nodratou i tatau na gole tiko mai Nailagolaba ni sa la’ki dre toka ko Malolo e na yakavi ni siga o ya.

Oti oya sa qai cabori tale e dua na i vakatale mai vei iratou na weka ni yalewa ni bera ni qai ia na veisukayaki e na yakavi.

Nodra sa lesu mai na veiwekani e ra gole yani ki Naqavoka, e sa qai mai cakava tale e dua na yaqona ni vakavinavinaka o Tukadratou na gone vei ira na mataveiwekani e na i tavi levu e sa qaravi e na siga o ya.

Sa lai rauta toka na 10 na kaloko e na bogi levu, era sa qai veitalatala na veiwekani, e na kena sa qai mai maca vakadua na waivuvu ni vanua.

Ratou sa na biubiu tale tiko na veitamani mai Varanise e na macawa mai oqo me la’ki tomani tale na qaravi i tavi mai na vanua e sa dui lesi keda kina na Tamada sa Cecere sara.

More Stories