Mai Drevekai ki Nakauvadra

Update: 10:36AM ESA koto oqo era na i kuri ni itukutuku nei Peni Tabua Tamanivalu na turaga ni Naloto ka veivakananumi tiko vei keda ena veimacawa, ni wiliwili sara yani.

E vakaraitaka o Peni Tabua ni dua tale nai tutu vakavanua ena matanitu o Rewa, yacana na i kasovesi, e sega ni i kaso ni tokatoka turaga, e ikaso ga ni vanua se matanitu o Rewa. 

�Na itutu oqo era tiko ena vanua o Dreketi, ena koro o Nabuli kei Vunisinu na Rokotuni mai Burebasaga, era colasau ka cudruvaka na vanua ena matanitu o Rewa, era icavu ni vanua, ni a tiko kina eliu o Rokoratu,� e kaya o Tabua.

E tomana o Tabua ni dua tale na itutu vakavanua ena matanitu o Rewa, na Lawadoko na yacana ka yacabuli ni kenai liuliu na Tunidau. 

�Ai tutu oqo sa ra tiko mai Vutia, se Vutiakoto, ka so tale na itutu era sa cavuti ga me Komai, ka Tui eso, ka Daunisoko na Vusanamu; ia na Daulevu sai liuliu ni matai era tiko mai Dorokavu, era kawa i Rokola, o koya na qase sa matai ni ta waqa,� e kaya o Tabua.

E kuria o Tabua ena nona i tukutuku ni o ira era tiko mai Nasigatoka, ka so era tiko mai Toga i Naqavoka, era lako mai Toga Levu, ka so i Natogadravu. Na kai Nukunitabua ga kei na Durucoko e segai. 

�Ia sai cavu ni Tui o Dreketi, kai cavu ni vanua o Burebasaga, kai cavu ni matanitu o Rewa,� e kaya o Tabua.

E kuria ena nona i vakamacala na turaga ni Naloto oqo ni o Noco na matanitu ivakaukauwa ni matanitu o Rewa, na kena Tui e tiko mai Nabudrau, tiko mai Nakuriwai na kena Vunivalu, ia erau veitacini ga na vu ni tutu oqo. 

�E ulumatua na Tui, gone na Vunivalu ke sa kawaboko na kawa ni Tui, sa na rawa me kau e dua na kawa ni Vunivalu me buli me Tui ia na vanua qo e dau cavuti talega na turaga buli me Tui me Vunisalevu,� e kaya o Tabua. 

E tomana o Tabua ni o Rokosau ga a lako mai Verata, sa buli nona kawa me Tui, a ulumatua o koya e tiko mai Nabuli o Noco e tiko na kena Gonedau, na kena Tuni kei na Komai eso, era iliuliu ena veikoro vakaNoco, mera vakaukauwataka nodra matanitu.

�O ira na vanua matanitu e so era dau cavuti me vanua vakaRewa ko Kadavu, Beqa, Serua, Vatukarasa, Korolevu, Namataku, Nadroga, Vatulele kei na Yatu Malolo,� e kaya o Tabua. 

E tomana o Tabua era dui vaka Tui, vaka Takala, Tuni, Matanivanua, Komai, Sau, mera vakaukauwataka na matanitu o Rewa me vaka sa wasei ena wase itutu ni tamata kei na vanua, kei na vanua matanitu a caka mai Drevekai era wasei kina na itutu ni vanua o Verata kei na vanua o Bau. 

�Na vanua o Rewa kei na Bukebuke (Namosi) era wasei mai na buca o Nabukebuke,� e kaya o Tabua. 

E kuria o Tabua ni o ira na kawa i Degei II ra wase itutu ni tamata kei na vanua mai Navitilevu (Ra) era vaka Tui ga ka Sau, ka Komai, se Kai, ka ra sega ni bau vaka vunivalu, e vaka vunivalu ga na matanitu o Verata, Bau, kei Rewa.

�O Bau na ikatolu ni wasewase ni vanua matanitu e Viti eliu o ira na lewena era kawa tagane vei Kubunavanua kei Tuiwai kei koya na Sau, ra kawa yalewa vei Lutunasobasoba, ia o Bau kei na kena veivanua matanitu kei na kena isasavu kece era voliti koya, era cavuti vata ga me kai Bau, nira matanitu vata,� e kaya o Tabua.

�Na yacabuli e liu ena itutu vakavanua ena matanitu o Bau, na Rokotui Bau,� e kaya o Tabua. 

E tomana na nona i vakamacala o Tabua ni Rokotui Bau, a digitaki kina e dua na turaga mai na Cokadi ni se bera nira bulia na dauveibuli.

�Era kauti koya mada ina itikotiko i Ratumaibulu, me vakatovolei kina, era kotora e dua na vatu ena dua na vunilolo sa nodra bure tiko na kadi, ena qai kau na turaga sa digitaki me lai dabe kina koya e yaca ni tokatoka liu kina mai na mataqali Rokotui Bau na Cokadi, a icoco ni nona idabedabe na kadi,� e kaya o Tabua.

E kuria o Tabua ni sa tovolei kina na nona sega ni yavalati rawa ena lewa na vanua, matanitu kei na kena veivukiyaki na lewa, me sa bika matua na lewa ni vanua me tudei, me tawamudu. 

�Ke sa vosota rawa na mosi ni nodra katilaki koya na kadi, me sega ni bau yavala na yagona, sa qai vakabau me buli me Rokotui Bau,� e kaya o Tabua.

E tomana o Tabua ni a dau buli eliu ena itutu oqo na Rokotui Bau Vuaniivi, ia nira vakatalai tani ena nodra dau vakasaurara, era sa qai dau buli ga na kena vo era tiko e Bau, me yacadra na Keteramasi, se Malo, se Malosivo me vaka na vanua eso. 

�A yacadra levu eliu na Sauturaga, se Vusaratu, ia e digitaki mai na itutu oqo na imatai ni Rokotui Bau, o Rt Seru Mataidrau na Vuaniivi, kei Rokoratu na �Cokadi,� na Vusaratu,� e kaya o Tabua.

E kuria na nona i vakamacala ni o ira na kena kawa ni gone mai na itutu Vusaratu oqo, era cavuti me Sauturaga, se ikasovesi ni vanua, era tu ena itutu ni Bati, se Liganiwau kei ira na kawa ni ulumatua era Turaga, se Liga ni Magiti o koya na itutu sa digitaki tiko mai kina e muri na Rokotui Bau.

�Ena gauna era biuti Nakauvadra kina na nodra qase, se yacadra tikoga mai na kawa oqo na Vuaniivi, se kai Naivi, se Vusaratu,� e kaya o Tabua. 

E tomana o Tabua e muri nira sa mai tiko ena wase itutu kei na wase tamata mai Drevekai mera dui muria na tamata na turaga sa lesi me iliuliu ni nodra dui vanua, sa yacadra levu tikoga na Vuaniivi se Sauturaga, se Vusaratu, na turaga lewena.

Ena qai tomani tale yani.

More Stories