Mai Drevekai ki Nakauvadra

Update: 10:56AM ESA koto oqo na i kuri ni i tukutuku nei Peni Tabua Tamanivalu na turaga ni Naloto ka veibulagoci tiko vei keda e na vei macawa, ni wiliwili sara yani.

E vakaraitaka o Peni Tabua e dua talega na qaqa ni vucu e sereka tiko vei keda me baleta na nona gauna na Ulumatua ka vaka koto oqo,

E kaya o Tabua ni sa dodonu ga me da na sarava na veika esa yaco tiko oqo ka waraka na nona gauna na Kalou ki vei keda na kawa i Taukei se cava na nona i naki ki vei keda. E kuria sobu o Tabua e na nona i tukutuku ni tomani na vucu e vaka koto oqo na qaqana,

Tu mada ka vakasarava

Ko cei sa weliwelia ka rui mata vinaka

Oqori na i keli vakatabana

Sa vuka voli e dela ni rarama

Na noda gauna meda waraka

Kua soti mada na veisaqasaqa

Me da tu ga ka vakasarava

Na gauna kei Viti sa qai cadra

E sereka na vucu e toka e cake o Tabua ena nona kaya me kua soti na veisaqasaqa e na gauna oqo na tamata tabu yani ka dodonu me da sa na vakamuria tikoga vakamalua nai tuvatuva kei nai nakinaki esa tovolei me da muria ka vakasalataki tiko kina, ia, me da sa na sarava ga na cava e na yaco ni sa na vakarau me na cadra dina ga mai na gauna kei Viti ka sa na sega ni rawa e dua na tamata, matanitu e vuravura me na saqata se tarova, ka ni sa na yaco ga me vaka na i tuvatuva ni Kalou.

Ia, e macawa oqo e tukuna o Peni Tabua ni dua na i tukutuku esa na tekivu me na lavetaka cake mai sai koya na kuila kei Viti kei na yaca ka basika mai kina na Ulumatua kei Viti ka dodonu me da sa na qai waraka na kena gauna.

E vaka koto na qaqa ni vucu ka vakadewataka na kuila kei Viti,

Na kuila kei Viti au sa colata

Au sa kelea ki loma ni wasa

Davo koto kina na kato ni mana

Sa nawa cake ki vanua mamaca

Na yameyame ni buka sa rerevaki sara

Na yalo ni Kalou e vitu e ratou yadrava

E kuria o Tabua e na nona i tukutuku ni sa sereki sara tikoga yani e na qaqa ni vucu oqo na kuila kei Viti ni na biu ena loma ni wasa sai koya na vanua e davo koto kina na kato ni mana, na kato ni mana ga oqo ka sa vakaraitaki oti yani e na vica na macawa sa oti ni a yadrava na jeruvi ni Kalou.

�Na qaqa ni vucu e koto oqo era e sa dusia tiko na yaca ni turaga ka rau lutu vata koto kei na kato ni mana ena Yatu Yasawa me vaka esa tukutuku tiko kina oqo na vucu,� e kaya o Tabua.

E koto oqo na qaqa ni vucu ka talanoataki tiko,

Dua na gauna yawa sara

Na kena yabaki e lutu i wasa

Ni mai lutu koto na kato ni mana

Rau lutu vata kei na noda Turaga

Ni vosota me�u vakatulou mada

Ko Ratu Nasaumaibulu na yacana

E vakaraitaka o Tabua e na qaqa ni vucu e koto oqo e cake ni sa mai vakaraitaki na yaca tabu oqo ka tukuna na vucu oqo ni a rau mai lutu vata koto kei na kato ni mana ka rau yadrava tiko na jeruvi.

Ia, ena yaca vata tiko ga oqo esa sereki sara tu ga kina vakamatata ni sai koya ga oqo na turaga levu ka na basika mai e na nodra kawa na ulumatua ka waraka tiko o Viti ena noda gauna na kawa i Taukei kei Viti.

E kaya o Tabua ni vaka koto na qaqa ni vucu ka talanoataki tikoga kina na yaca vata ka sa biu koto e cake,

Na yaca tabu au sa tabaka

E kilai me ko Ratumaibulu e na so na yasana

E sega ni ko koya ko Koto-i-na-qara

Se ko Degei me vaka era kaya

Sai koya oqo na Ulumatua na nona kawa eda waraka

E tomana o Tabua ni sa tucake sara tu ga vakadodonu na vucu me sereka na i tukutuku ni noda vakasaqara tiko na Ulumatua ni kawa i Taukei se o koya e dodonu me na buli mai kina na Tui kei Viti se Tui ni sautu me vaka e levu era sa vakadewataka tiko mai me yacova na gauna vinaka oqo.

�Au vakanuinui ni na sega ni levu vei kemuni na kawa Turaga Bale kei Viti ka Marama Bale talega kei Viti mo ni na coqa mai na i tukutuku au sa tekivu me�u vakaraitaki koya cake mai oqo,� e kaya o Tabua.

E tomana o Tabua ni dua sara na gauna balavu na nona lutu koto ena i vola i tukutuku me baleti Viti, ia esa kena gauna oqo me na duri cake ka vakaraitaki koya mai ka ni ra tiko oqo e na noda vanua na nodra kawa bula na turaga levu oqo se o koya na Ulumatua ni kawa i Taukei ka sa waraki koya tu o vuravura me na mai dolava na i yau bula kei Viti ka sulumaki Viti talega e na kena i tovo dina ka ra dau maroroya ka vakamenemenea voli mai na noda qase era sa bale yani.

E vakadeitaka o Tabua ki vei keda na kawa i Taukei ni matata vinaka tiko na keda i sema na kawa bula kei Viti ena vuvale ka ra a biuta mai na noda yavutu taumada ka veivakatikori taumada kina na Kalou ni bera ni qai vakaraitaka na vanua vakarautaki oqo o Viti me ra na mai vakarautaki ka wawa voli kina ena nona na lesu tale mai na Kalou levu vata ga oya ka a vakaraitaka taumada vei ira na vanua o Viti me ra mai waraki koya kina ka na cabe vata kei na veika e sa vakarautaka oti tu me baleta tiko na kawa tamata qo vei vuravura.

Ena qai tomani tale yani.

More Stories