Mai Canada

E VAKARAITAKA ko Iliesa Tanivula na dauniveivakatavulici ni sa na tomana sara na nodratou vakavakarau na timi ni Telecom Fijiana ena vuku ni sotasota ni Canada 7s ena macawa mai oqo. E tukuna o Tanivula ni dodonu me ratou na vakavakarau rawa.

E kuria o Tanivula ni gadrevi me ratou vakacegu vinaka na goneyalewa ena macawa qo ka ratou na qai vakaukauwa yago vata tale ena macawa mai oqo.

E sa vo wale tikoga e tolu na macawa na nodratou vakavakarau na timi ni bera ni qai vakayacori na sotasota mai Canada.

Na timi ni Fijiana ea vakaitavi ena sotasota ni HSBC World Rugby Women?s Sevens Series ena Kitakyushu 7s mai Japani ena mua ni macawa sa oti ka ratou la?ki druka ena semi fainala.

E tukuna o Tanivula ni sa digova rawa na vanua e ratou malumalumu kina na noda goneyalewa ka ratou na raica vata na kena vakavinakataki na nodratou malumalumu ni bera tiko na sotasota mai Canada kei Varanise ena vula mai qo.

Na yasana e dodonu me vakavinakataki oya na kena vakadeitaki tiko na i vakarau ni kaukauwa ni qito kei na i tuvaki ni yago.

E dodonu talega me vakalailaitaki na cala era dui vakayacora yadua na dauqito kei na i vakarau ni vakatulewa e vakayacori ena gauna e kaukauwa kina na qito.

E ratou sa lesu oti mai ena sotasota mai Japani na noda goneyalewa ka ratou sa vakacegu toka qo ena noda vanua ni bera ni qai tomani na nodratou vakavakarau ena macawa mai oqo.

More Stories