Macawa tabu

Update: 11:55AM EDA sa vakanamata yani na lotu va- Karisito ena macawa tabu na loma ni macawa oqo- ena noda vakananuma na nona mai mate na noda i Vakabula o Jisu Karisito me da rawata kina na bula na kai vuravura.

Na Siga Tabu sa oti eda mai vakananuma kina na nodra Siga Tabu na gone, oya na nodra vakaraitaka se vakananuma vei keda na nona a curu vaka- Tui na gone turaga o Jisu ni vo ga e vica na siga me laki lauvako kina ki na kauveilatai.

Ena nona i tukutuku mai ena Siga Tabu ni Mate na Peresitedi ni Lotu Wesele, era vakaraitaka kina ni ka bibi na kauveilatai kei na soli bula e solia na noda i Vakabula me da rawata kina na bula.

Vakadeitaka mai o Talatala Epineri Vakadewavosa ni dodonu meda vakabauta na tamata e vakabauti Karisito ni vakacava na i tutu ni bula ko tu kina, se mani vakacava na dredre kei na yaluma ni bula ko lako curuma, meda na kila tiko ni Kalou e lomani keda tu ka vinakata me da rawata na bula tawa mudu e sa vakarautaka tu vei koya ga e vakabauti koya.

Eda vakavinavinaka ni da na vakananuma tale e dua na macawa tabu ena mua ni macawa oqo.

E dau siga ni vakacagicagi balavu vei keda, ka levu talega na ogaoga eda dau qarava kina na i Taukei.

Me kua ga ni kauta tani vei keda na i balebale dina ni noda vakabauta kei na noda marautaka na siga oqo.

E sa veivakasalataki talega na matanitu ena tabana ni tukutuku ni dodonu meda na qaqarauni toka na lewenivanua, ena vuku ni draki suasua kei na taubi ni uca.

E da sa vakasalataki tikoga ena noda qaqarauni, ka qarauni na gauna eda veilakoyaki kina, na noda taubale se vodo lori, meda na qaqarauni tiko ena vuku ni taubi ni uca.

E dau levu talega na qito e dau vakayacori kei na sara qito ena retio yaloyalo e da dau vakanamata kina.

Esa kerei tikoga na noda qaqarauni na lewenivanua ena vuku ni vakacalaka e na rawa ni yaco.

E na macawa talega oqo eda rogoca tiko na nona vosa tiko vakabibi na noda i liuliu ni matanitu ena vuku ni nodra i tovo na gonevuli kei na nodra sa vakayagataka tiko na nodra dodonu me i ulubale ni sega ni rawa ni ra totogi se moku kina mai vei ira na qasenivuli.

E dua na ulutaga oqo e dodonu meda na veitalanoataka vakavinaka. Eda sa vakadinadinataka ni sa luluqa mai na i tovo nodra na noda i solisoli.

E ra sa beca na vosa ni tubutubu kei ira era qase cake vei keda.

Eda sa raica na yalo ni douvaka na cakava e so na i tovo e sega ni kilikili ena gauna oqo.

E daumaka me da sa vakavinakataka ga mai na noda veivuvale na nodra i tovo na luveda, me da vakatavulici ira ena sala dodonu me ra muria.

Ni ra qase mai, era na sega ni lako tani mai kina.

E sa vakanuinui vinaka na Nai Lalakai ni na dua na macawa vinaka vei keda na mua ni macawa balavu ni vakacagicagi ena siga Vakaraubuka ki na siga Moniti mai oqo.

More Stories