Lomaleqa ena kelikeli

E LOMALEQA o Josaia Vukici Korolevu yabaki 40 mai na koro ko Namena, Tailevu e na kelikeli e caka tiko e na tolo ni wai ena nona i tikotiko e sa vakacacana na nodratou i qoliqoli.

E vakaraitaka o Korolevu ni sa dua dina na leqa levu e rawa ni kauta mai na veivakatorocaketaki ke sega ni da na vakatulewa vakayalomatua kina.

Sa vuvu tu ga na wai mai na mataka e na tekivu kina na kelikeli me yacova sara 10 na kaloko e na bogi, e kaya.

Tomana ka kaya ni sega ni duavata kei na veika e ratou sa cakava tiko na kabani ni qaqi vatu ni simede na Standard Concrete Industries e Laqere, Nasinu e na uciwai o Naivisere ena gauna oqo ka drodro kosova tiko na gaunisala mai Korovou ki Vulinitu.

Au lomaleqataka tiko na kelikeli e ratou cakava tiko qo ni na kauta mai e dua na leqa levu vei keitou oya e na kena rawa ni sisi na qele ena neitou i tikotiko, e kaya o Korolevu.

E tubu na noqu ririko kei na noqu loloma baleta niu nanumi ira tiko na kawa ni vanua qo e na veisiga ni mataka.

E vakaraitaka o Korolevu ni so na yakavi era dau suka mai na vuli na gone e rawa nira dau mai qoli e na uciwai qo o Naivisere, ia, ena gauna qo era sa sega ni rawa ni mai qoli ka sa vuvu tiko na wai mai na mataka lailai me yacova sara na tini na kaloko ena bogi.

Ratou na kelikeli tiko e na uciwai qo me lima na yabaki, sa na sega ga ni dua na ika, e na bula e na wai qo, e kaya o Korolevu.

Kuria ka kaya o Korolevu na vanua e lutu tale tu ga kina na waiwai ni idini ni katavila ka kelikeli tiko e na rawa ni vakacacana na veika bula e uciwai.

Ia, e vakaraitaka o Mosese Volavola na manidia ni Standard Concrete Industries e Laqere, Nasinu ni ratou sa vakayacora taucoko na veika e gadrevi me dua nai laiseni ni kelikeli.

Keitou sa laki dikeva vakavica na vanua oya, ka ratou sa vakadonuya talega mai na Tabana ni Environment, e kaya o Volavola.

E tomana o Volavola ni dau rawati na lasseni e lako curuma e dua na gauna e na kena vakayacori na vakadidike, ka vaka kina na nodra veivakadonui na lewe ni yavusa.

Keitou sa ciqoma na laiseni ni kelikeli e na nona vakadonuya na tabana ni qele (TLTB), e kaya o Volavola.

E vakaraitaka talega o Volavola ni kidacalataka na nona rogoca ni kudruvaki na kelikeli e na wai qo ka ni sa ra vakadonuya oti na lewe ni mataqali kece e na loma ni yavusa ka ratou sa solia talega na i lavo e na vei vula e na kena saumi vei ira na i taukei ni qele, na i sau ni kena keli tiko na vatu.

More Stories