Loloma mai Korea ki Koro

Update: 10:38AM Eratou sa ciqoma na komiti ni veivakatoroicaketaki mai Nasau e Koro na veivuke ni lotu mai Korea me sa na tara e dua na valenilotu vou. E a solia na jeke na Vunivola Levu ni lotu o Talatala Epineri Vakadewavosa vei iratou na lewe ni komiti oqo mai Nasau ena veivuke levu e ra sa vakayacora tu na wekada mai valagi ena vuku ni lotu nei Jisu.

Me vaka eda kila vinaka ni sega ni vukea na matanitu na tara ni valenilotu e Viti, esa saga saraga na lewe ni lotu na veiqaravi oqo- ia e sa vakavinavinaka na Lotu Wesele ena nodratou veivuke na lotu mai Korea na Gaepo Methodist Church ena solisoli levu oqo.

E kaya o Talatala Vakadewavosa ni ka levu na vakavinavinaka kei na yalo ni loloma, baleta ni tu talega na gagadre ena nodra tara taumada e liu na nodra veivakacokotaki na lewe ni koro- oya na kena vakavinakataki talega e 130 na vale ena loma ni koro oqo o Nasau.

E na vula o Okosita, e vakavinavinakataka mai nai Talatala Qase mai Koro na nodra yalo ni soli-ka na lewenilotu ena nodra solia rawa na nodra esitimeti e $40,000 dina madaga ni ra sotava tiko na dredre.

Kaya o Manoa Duguwale na lewe ni komiti oqo mai Nasau ni dua na ka na nodratou vakavinavinaka na lewe ni yavusa ena yalo ni veikauwaitaki e ra vakaraitaka mai na wekada vakalotu mai na vanua levu oqo o Korea.

 E kaya ni sa tu vakarau na komiti ena kena vakarautaki mai na ripote kei na macala ni kena vakayagataki na i lavo oqo ena kena i naki e a soli mai kina.

More Stories