Lolo ga kei na masu

VEIGAUNA kece niu bera ni karia e dua na tolo ni kau, me?u vakayagataka e na noqu vakasaqa wai, au na dau kerea rawa e liu ki na vunikau, karia oti, au na qai vakavinavinaka tale ki na vunikau oya, baleta ni da sai bulibuli kecega ni Kalou.

Oqori na i vakamacala e cauraka mai ki na noda niusiveva oqo na i Taukei ko Makipani Tucika ka i Vakatawa tiko ni Lotu Wesele e na koro ko Culanuku e na yasana o Serua.

E kaya na turaga ni Daku, e na Tikina o Nadogo, e na yasana o Macuata, ni sa yabaki lima mai oqo na nona Vakatawa tiko e na koro oya, ia, na gauna e se qai mai tekivu kina e raica ni sa levu dina na tauvimate e na koro o Culanuku, so e masulaka ka ra bula, so e sega.

?Au sa qai lolo ka masumasu me macawa dua, mai na Siga Tabu ki na Siga Tabu, ka?u kerea vua na Kalou Levu ko Jiova me solia vei au e dua na i solisoli, ni veivakabulai me?u rawa ni vukei ira kina na wekaqu e na koro oqo.

?Au sega ni qai masulaka tale na noqu vuvale, au vakatusai au tu ga vua na Kalou, noqu tiki ni lesoni na Same 51, au wilika tuga au vakatusai au vua na Kalou, tarava ga noqu vakatutusa, au sa kerea sara ga na i solisoli ni veivakabulai.

?E na yakavi ni Siga Tabu ni oti e macawa dua na noqu lolo kei na masumasu, ni oti na noqu vakayakavi e na 4 na kaloko e na yakavi, sa manati au sara mai e dua na via moce vakaitamera, ka?u mani dodo tokoga e na yasa ni ibenikana, ka ni sa bobo tikoga mai na mataqu ruarua,? kaya o Tucika.

Tomana ni nona moce ga oya e sa raica sara ni dua na turaga e sa laveti mai matana, ka raica sara e rua na vunikau, oya na vu ni yasi kei na vu ni yalu.

E kaya o Tucika ni rua na vunikau oya e na sega ni yali vakadua vei koya, ka ni yadra mai na kena mataka, sa wasea sara tiko vei iratou na nona vuvale na tadra ka a se qai tadra oti ga.

Kuria o Vakatawa ni sega ni dede e sa curu yani e dua na marama ka tukuna vua me la?ki raica mada na luvena sa sega ni rawati mai Valenibula, macawa rua mai Namelimeli, la?ki macawa dua tale e na i Soqosoqo ni Lotu i Kavitu, me caka vua na (detox), sa sega ga ni rawa sa vakasukai tale mai, me mai wawa mate ga e vale.

E kaya o Tucika ni gauna e lako kina ki nona vale, sa davo tu na cauravou oya, ka sa mani tukuna sara me ratou cuva, me dua na nona masu.

?Na gauna ga au bobo kina me?u masulaki koya, au sa raica tale na rua ga na kau, au sa vakamacalataka oti koto e cake ni sa baci vakaraitaki tale mai vei au.

?Oti ga na masu, au sa tukuna sara vei iratou na veiwekani me ratou wawa toka mada, au gole sara ki vale, taura na noqu i sele kava, ka?u lai kauta mai na kau e rua ka?u tadra tiko, mai vusoya, kau solia sara vua e dua na bilo.

?Ni oti ga e siga tolu, sa tucake na cauravou oya, ka sa cakacaka tale tiko e na otela me yacova mai na gauna oqo, ?kaya o Tucika.

Kuria o Tucika ni dua na siga e ratou sa basika yani e lewe lima na tauvimate, ka cici vakalima ki veikau me la?ki vaqara mai na medratou wai.

Tomana ni ratou qai lotu e na kena yakavi na gauna e qai masu kina sa vakatusa ki vua na Kalou Levu ko Jiova ni sa ka ni vakaoca vei koya na cakacaka oya.

E kaya o Vakatawa ni qai moce e na bogi oya, sa tadra ni sa tu e matana e dua na kuro kei na veimataqali kau kei na draunikau ka sa vakasaqara tiko e na gauna oqo.

?E liu e se walu ga na veimataqali kau, oti sa mai toso cake e na tinikava, ia, na gauna oqo e sa tinikaciwa sara na kau e vakasaqara tiko, oya e okati kina na kuli ni kau kei na draunikau.

?Na gauna oqo kevaka e dua e la?ki vakamacalataka yani vei au na mate e tauvi koya tiko, ke sega ni tiko e na tinikaciwa na kau sa vakasaqari tiko, au na raica ga na yagona, au na raica sara ga na kau me?u la?ki kauta mai, qo kevaka e mate vou,? kaya o Tucika.

E kaya o Tucika ni kau kece e 19 e vakasaqara tiko sa i ira oqo: (yaca vaka Macuata) na sea, ceecee, ariarialavo, vesi, yalu, dawa, boiboida, talabia, bobo, verevereti, losilosi, doidamu, tarawaueicoke, molautagane, uluulu, (drauniacu) totodro, druni rautolu, eveevedrka, drauni walai.

Na veimataqali kau kei na drau ni kau oqori e dau vakasaqara vata tiko o Tucika e na veisiga Lotulevu, Vakaraubuka kei na Vakarauwai.

Tomana ni yacova mai na gauna oqo, e sa sega ni taqea rawa na levu ni tamata era sa ciciva tiko yani na wai e Culanuku, ka sa tu vakarau o koya kei iratou na nona i lala me ratou veivuke e na kena i vakatagedegede sara e cake.

E kaya o Tucika ni siga Vukelulu e dau nona siga ni gole ki veikau me la?ki kauta mai na wai, ka sega ni lavaka e dua na i lavo vei ira na mai kau wai.

?Na ka ga o ni nanuma mo ni dodoliga kina mai na yalomuni sara e rawa, au sega ni vakasaurarataka e dua.

?Baleta ni oqo na i solisoli ni Kalou vei au, ka?u na sega ni doudou kina me?u surevaka yani na veika o ni via solia mai.

?Ke o ni solia mai e dua na ka se sega, e sega sara ga ni dua na ka vei au, baleta ni levu sara na tauvimate e sega ni rawa mai valenibula, era sa mai tucake rawa e na wai ni bula e Culanuku,? kaya o Vakatawa.

Tukuna o Tucika, na ka ga me ra kauta ga yani na nodra tavaya, kei na siga e tolu e sa vakaraitaka no oqori e cake me ra lako yani kina, ka ni na waraki ira toka mai nodra vale.

E vakavinavinakataki iratou vakalevu na cauravou o Tucika e na nodratou dau vukei koya tiko, ka sa tekivu vakaraitaka tale tikoga na veimataqali kau ki vei luvena, ka sa vukei koya sara tiko vakavinaka e na gauna oqo.

Sa nuitaka tiko o Vakatawa ni da na veitukutukunitaka yani na wai ni bula oqo, ia, ke tu na nomuni vakatataro matailalai, ni qai veitaratara ga yani ki na nona talevoni veikauyaki e na: 9569029.

More Stories