Lewa dodonu: Miti

E vakaraitaka o Mitieli Bulanauca ni vinakati me na yaco na vakatulewa dodonu ena vuku ni veika e yaco tu ena noda vanua me vaka na qele ni taukei, kei na veika e vakayacori na Noveba ni 2000.

Ena i sevu ni nona vosa e Palimedi o Bulanauca e vakavinavinakataka na nodra veivakabauti kei na veitokoni vua o ira turaga ni vanua ena yasana vakaturaga o Bua.

E tukuna o Bulanauca ni ra a solia tu na nodra veitokoni ena vuku ni nona vakaitavi ena politiki ka mai rawa kina me rawata e dua na nona i dabedabe e Palimedi.

Ia e vakadiloya talega na veidigidigi ena yabaki oqo baleta ni lekaleka na gauna e soli kina vei ira me ra vunau vakapolitiki ka vakabauta ni a vakatotolotaki na veidigidigi.

E a vosa ena vuqa na ulutaga o Bulanauca ka vakaraitaka ni sega ni maroroya dina na Yavu ni Vakavulewa ni 2013 na qele ni kawa i Taukei kei na kena taukeni na i qoliqoli.

Vakadeitaka talega o Bulanauca ena bose lawa ni dodonu me na laurai vakavinaka na ilavo era dau taura tiko na i taukei ni qele kei na kena cicivaki na tabana ni mahoghany e Viti, na tabana ni Fiji Pine.

E kaya ni Yavu ni Vakavulewa ni 2013 e togoraki mai vei keda na lewenivanua.

E tukuna talega ni ra se tagi tiko na lewenivanua kei ira na vuvale era a mai leqa ena yabaki 2000.

E dodonu me na laurai ni yaco na lewa dodonu kei na nodra nanumi o ira era kila ni caka vakaca vei ira na lewa dodonu e Viti.

More Stories