Levu na mate dole

Update: 9:58AM KAUWAI sara tiko na Tabana ni Bula ena levu ni mate dole vei keda na lewenivanua e Viti ka levu era sa sega ni marautaka kei ira na wekadra na nodra siganisucu ni ra sa yabaki 50.

E vakaraitaka tiko na tikina bibi oqo o Vuniwai Isimeli Tukana ka kaya ni 1300 na lewenivanua era sa mate tiko mai na mate sureti oya na mate ni suka, ka oka eke na mate ni suka, na tubu ni dra, na levulevu sivia.

E kaya o Vuniwai Tukana ni sa veisau sara na i vakarau ni bula kei na kakana ni lewenivanua, ka dodonu me da sa na veisautaka na i vakarau ni noda rai.

Vakabibitaka tiko o Vuniwai Tukana na noda laki laurai vakawasoma e valenibula.

Mai na i tukutuku e tauri rawa mai na minisitiri, e rauta ni 500 na lewenivanua era mate ena mate na stroke.

E rauta ni 1000 na lewenivanua era mate ena tubu ni dra ena loma ni dua na yabaki,

E 200 era mate ena mate ni yate vuso, ka rauta ni  lewe 90 era leqa ena veiyabaki mai na mate ni ivi.

E veivakadreti tikoga o Vuniwai Tukana ni rawarawa sara na kena wali na leqa oqo, oya me da na veisautaka ga na kakana eda kania, me da kania na kakana bulabula, ka me levu tlega na noda vakaukauwa yago kei na tiko bulabula.

 Ka musuki sobu na kena vakayagataki na yaqona ni valagi, na tavako kei na kena rokovi na lawa ni yago. 

More Stories