Levu era sa sega ni kila

SA tu yadudua vei keda na i taukei me da kila vakamatata na noda i tokatoka, mataqali kei na yavusa kei na i tukutuku ni noda kawa e na kena lesuvi e vca sara tale na i taba-tamata.

E vakaraitaka ko Ratu Sakiusa Yavala Nakuila mai na i Tokatoka o Narogoirua ni matata vinaka tu vua na kedratou i tukutuku.

Lima na noqu i Tokatoka na kena i matai o Narogoirua, Naboseiwale, Naqarasiga, ka va ni Tokatoka o Nawaqaliqali, kei na kena i ka lima o Nabilisau.

Na noqu mataqali o Koroivabeka, noqu yavusa o Noikoro. Volai tiko e na i vola ni kawa bula na 45K sa bokoci o Noikoro me keitou sa vakayavusa kece ki Koroivabeka, e kaya.

Keitou lewe ni yavusa dina o Noikoro, ia, na neitou gagadre keitou sa kerea me keitou sereki mai na veivakabokoci e caka tu e na i vola ni kawa bula.

Au luvei Saiasi Baleca tinaqu o Makitalena Seniqumu na tukai keitou o Ratu Aisea Naitininikoro na waitina yalewa ni Kuruyawa e Korolevu e Lomaiviti, e kuria.

Kaya o koya ni tamai Aisea o Ratu Ilaisai Naroiroi ka levu tu na yacana o Tai Natukatuka, o Tabutabutoko se o Navosavakadua.

Na tamai Ratu Ilaisa o Ratu Aisea Naitinibua na taci Tuivanuakula se o Kubunavanua e na nona vosa manataki koya o Rokomautu na tamana baleta ni sa qaqa e na veitau cici mai Verata na kawa ni gone na kawa i Lutunasobasoba.

Rau sa veiyacani kei Kubunavanua na taci Lutunasobasoba.

Kuria ka kaya ni luvei Kubunavanua se o Tuivanuakula o Rovarovaivalu.

Keitou dau cavuta tu mai nakoro me o Raturova se o Turova.

Ko ya ko i rau na neitou qase o Kubunavanua kei Lutunasobasoba.

E kaya o koya ni i rau oqo, na nodrau qase o Tura.

Kuria ka kaya o Ratu Sakiusa ko Tura oqo e yacai tamana o Neori, na yacai tamai Neori o Seruke, na yacai tamai Seruke o Rekau, na yacai tamai o Rekau o Peleki, na yacai tamai Peleki ko Iperi, ko Iperi na yacai tamana o Sela, o Sela na yacai tamata na o Keina naba rua, o Keina naba rua na tamana o Afakisati, o Afakisati oqo na i taukei ni yavusa ka yali tiko. Ko Afakisati na i taukei ni valu ka Tui kei Isireli na tamana o Semi.

Ko Semi oqo e dua vei iratou na lewe tolu na luvei Noa .

Ko Semi oqo e dua vei iratou na lewe walu ka a bula mai na luvuci ni vuravura o iratou na veitacini kei na dui watidratou, o Noa kei na watina.

Ko Noa na yacai tamana ko Lemeki, ko Lemeki na yacai tamana o Meciuisela, ko Mesuisela na yacai tamana o Inoki, ko Inoki na yacai tamana o Jereki, na yacai tamana o Mitieli, na yacai tamana o Keina naba dua, na yacai Keina nada dua o Inosi, na yacai tamai Inosi o Seci. Ko Seci oqo e rau veitaicini kei Keni, ka a vakamatei Epeli ka sa qaibula tu mai na kawa nei Seci. Ko o rau na luvei Tomaniivi, Ko i rau ko Tomaniivi oqo na tamadrau na Kalou ko Ratumaibula.

Tomana o Ratu Sakiusa ka kaya sa i koya oqo na nodratou kawa nei Rokotubuna ka ratou vakamacalataki iratou me baleta na Tui Viti. E kaya o Ratu Sakiusa ni tiko dina na Tui Viti mai na kawa i Waicalanavanua, Lutunasobasoba kei Kubunavanua.

Kuria ka kaya ni Tui Viti e tiko ka ai solisoli ni Kalou vei iratou na kawa nei Ratutubuna, na kawa i Lutunasobasoba kei Kubunavanua na kawa ni Qalikamani. Keitou qo na kawa i Qalikamani, e kaya o Ratu Sakiusa.

E dusimaka ka o koya ni veivolavola kece e sa yaco tu ga ena veiyavu e Loboya na kawa nei Sasaroko. Ratou se yaco leka toka ga e Vunavuga, ka tiko e na veitokaitua e Navosa e Navosa.

More Stories