Leqa ni gaunisala

KEIMAMI dau colata na neimami i voli, ka vuqa na gauna e dau veivuke vakalevu sara vei keimami na neimami ose e na nodra vakavodoka na neimami i voli me yaco sara ki na delana o Kavukavu, e na vanua e wawa tiko mai kina na keria.

E vakamacalataka toka na i vakamacala oqori o Aseri Matavutuka e dua na marama ni koro ko Draubuta e na Tikina o Noikoro, Navosa, e na nona volitaki moli tiko e na makete levu e na Koro Turaga e na macawa sa oti.

E kaya o Matavutuka ni dredre ni nodratou gaunisala, e vakavuna na nodra yadra e na tolu na kaloko e na mataka lailai, vakavodoki na taga moli e na ose, ka so e colati ga, ka ra qai taubaletaka erua na maile me yacova na delana o Kavukavu.

Ni ra sa yaco yani ki Kavukavu sa ra qai la?ki vakavodoki na taga moli e na keria ni bera ni ra qai gole sobu mai na tauni mai Sigatoka, ka dewa sara mai ki Suva.

E kaya o Matavutuka ni jajitaki mai na keria e na tiko ki na $600 ki na $700 na dola, oya e tauya $25 dua na tamata, ka na qai vakatau ga na levu ni tamata era vodo e na dua na keria.

Tomana na marama yabaki 48 oqo ni vinaka ga ni sega ni saumi yadudua na nodra taga moli, e saumi ga na nodra  i vodovodo.

?Qai oti ga na vakavodo e na ono na kaloko e na mataka lailai, sa biubiu mai na keria.

?Neimami toso mai oqo, mai sobu e so ki na makete mai Sigatoka, ka keimami qai yaco mai Suva e na veimama ni va e na yakavi,? e kaya.

Kuria o Matavutuka ni nodrau volivolitaki tiko kei na nona i tokani o Mereoni Nanuma e na yacova sara na siga Vakarauwai.

Tomana ni siga Vakarauwai erau na qai volia na i yaya e rau via kauta cake ki nakoro, ka ra na qai lako tale mai ki Suva e na macawa mai oqo.

More Stories