Laveti na vakatatabu

Update: 10:26AM SA QIMA oqo e dua na drau na bogi, drau sa yavavala saka tiko na gone turaga, sa cuva saka tiko na bilo ni vanua, ia e warai ni laurai e dua na i vakatakilakila ni ra sa leca na Gone Turaga na Roko Tui Toga, baleta ni drau tutaka tikoga na nodra cakacaka mai na gauna o ya, me yacova mai na gauna oqo ka dewa yani ki na veigauna tawa kilai e sa tu saka e matada.

Vinaka saka vakalevu na yalo ni veivakaturagataki, vinaka saka vakalevu na kena laveti saka tiko na i tikotiko e Valelevu.

Vica na siga e sa oti sa caka saka e dua na yaqona me tara kina na wai, me qolivi saka na nodra i qoliqoli na Gone Turaga na Roko Tui Toga, me vakayagataki saka e na nodra soqo e na siga e dai.

Sa tara saka talega e na loma ni vanua na vakayaco soqo me vaka na vakamau, na kau mata ni gone, kei na soqo cava tale e na siga e daidai.

Oqori na vosa ni tubetube e cavuqaqataka toka o Labereto Tawake na nodra matanivanua na Gone Turaga na Roko Tui Toga e na gauna e vakaraitaka tiko kina na nodratou i yau mai Valelevu e na soqo ni vakataraisulu e na vakacagicagi e na siga Vakaraubuka ni macawa sa oti.

Tomana o Tawake ni ratou sa vakatatabu saka tiko na Radini Vanua, na ganedra na Tui Toga kei na nodra vasu, ka sa tubera tiko e dua na kamunaga e na siga oya me i luva ni nodratou i sulu.

�Sa na oti saka e dai na vakatatabu vei ira saka na Gone Turaga na RokoTui Toga, au vakavinavinaka saka tiko vakalevu vei kemuni na veiwekani na nomuni mea saka tiko na vanua.

�Dina saka ni kui na wai, dina saka ni liwa na cagi, ia, au vakavinavinaka ni drau tudei saka tu e na qaravi ni i tavi e Valelevu.

�E dina ni tu saka na malumalumu mai Valelevu, ia, e warai ni rogo e dua na kena vosa.

�Oya saka na ravi Turaga, oya saka talega na mea na Turaga.

�Vei na vanua me ra ravi kina na makubuqu, vei na vanua me ra tatakube kina na makubuqu, e warai tale ni dua na vanua, era na rai ga vei kemuni na lewe ni yavusa o ni tiko rawa e na siga e dai,� e kaya.

Tinia na nona vosa o Tawake ni nodratou qai yani e na siga o ya na makubuna e ratou sega ni la�ki vaqara i yau, se magiti, e warai, e ratou qai tikoga yani me ratou lai vakaraitaka na nodratou vakavinavinaka vakaitamera e na vuku ni veika era sa vakayacora tiko na lewe ni yavusa me yacova mai na siga o ya, ka sa vakanuinui ni na vakayacori tikoga me yacova na rusa ni vuravura.

E ra vagagalu ka qusi wai ni mata na veiwekani era osota tiko na vakatunuloa e na siga oya, e na momona ni vosa ni tubetube nei Qasenivuli Vakacegu.

Sa dua na ka na levu ni i yau e vakarautaki e na siga oyu, na dramu karisini, na dadalobi i sulu, ka vakakina na masi kei na kamunaga lelevu, e ratou vakarautaka mai Valelevu me la�ki luvati ki na vanua.

E sa dina ga kina na i vosavosa oya, ni �Veika lelevu e laurai ga mai Valelevu.�

Ni oti na nona vakacabo o Tawake, sa qai vakacabora tale mai e dua na kamunaga o Laitia Beka e dua me vonoti kina na i yau vakaitamera e ratou kauta mai Valelevu,ka vakairaitaki talega ni dua na magiti droka kei na vakasigalevu e sa vakarautaka tiko yani na vanua.

Na gauna e sa vakayacori oti kina na veiqaraqaravi vakavanua, e ratou sa qai gole cake e lewe va na marama me ratou la�ki kotivi iratou na vakatatabu tiko.

Oti oya e sa qai mai vakayagataki e dua na i vakasigalevu rairai totoka, ni bera ni qai mai vakayagataki toka yani na wai ni vanua, ka masi vinaka na ibe e na i vakatagi rogorogo vinaka e ratou vakatara toka kina na matasere na �Siga Vou kei Navatuyaba� ni ra bera ni qai veisukayaki na veiwekani ni sa karobo mai na vanua.

More Stories