Lave rara mai Sigapoa

NA nona mai qaqa o Viti vei Ositerelia ena 28 kei 22 ena fainala levu ni HSBC Sigapoa 7s esa vakavuna kina me mai liu ena tuvatuva ni poidi ena sotasota ni HSBC World Rugby Sevens Series.
Na timi ni Viti a qaqa vei Niu Siladi ena kota fainala, ka mani vakadrukai Sauca Aferika ena semi fainala ka sa liu kina ena 4 na poidi mai vei Sauca Aferika.
Na timi ni Ositerelia esa mai ka va tiko ena tuvatuva ni poidi ka dei tikoga ena i katolu ni itutu na timi ni Niu Siladi. E vakaraitaka o Jerry Tuwai na kavetani ni timi ni Fiji Airways Fiji 7s kina Wolrd Rugby ni sega ni vosa rawa, ka kuria ni timi vinaka o Ositerelia ka ratou solia taucoko na nodratou bula ena qito ni fainala. E kuria o Tuwai ni nodratou qaqa qo mai Sigapoa ena vukea cake na nodratou vakarautaka na sotasota mai Lodoni kei Parisi.
E vakavinavinakataki ira na dauveitokoni era sara qito tiko ena valenisarasara mai Sigapoa o Tuwai ka vakavinavinataka talega na masu kei na veitokoni yani e Viti ena vuku ni veivakabauti vei ratou na lewe ni timi.
Ia, ena sotasota ni rakavi lewe ya vitu mai Lodoni e liutaka na Tobu A o Viti ka na qito tiko kina kei na timi ni Niu Siladi, Sikoteladi kei Argentina. Ena Tobu B ena qito tiko kina na timi ni Ositerelia, Spain, Welesi kei na i ka 16 ni timi esa bera ni vakadeitaki tiko. Ena Tobu C ena qito tiko kina na timi ni Igiladi, Kenya, USA kei Varanise. Ena Tobu D ena qito tiko kina na timi ni Sauca Aferika, Canada, Samoa kei Rusia. Na sotasota ni rakavi lewe ya vitu mai Lodoni ena vakayacori tiko ena i ka 3 kina i ka 4 ni Jiune. Na sotasota ni rakavi lewe ya vitu mai Parisi ena vakayacori tiko ena i ka 10 kina i ka 11 ni Jiune.

More Stories