Laukati na baca

LEVU sara na kedra i talanoa na noda Vu e na veiyasai Viti, e sa tabaki oti e na noda niusiveva oqo ni i Taukei e na veiyabaki sa oti yani.

Dua na i talanaoa ni ‘Marama Draidrai’ mai na koro ko Namuavoivoi, e na Tikina ko Lekutu, e na Yasana o Bua.

O ya me baleta na nodra marama ka dau bacani ira na meca e na gauna ni veivaluvaluti e liu, e na nona la’ki dabe luvaiwale tiko e na gaunisala ka ra muria mai e na loma ni veikau.

Na gauna sara ga me ra wele tu kina na meca, e na nodra tirivutaka tu na totoka ni marama oya, era qai kidacala ga ni ra sa wavokiti ira na sotia ni Namuavoivoi, ka ra mokulaki, se ra kau vakavesu ki nakoro.

Na i talanoa ni nodratou Vu na koro ko Qelekuro mai na Vualiku kei Tailevu, e na nona dau matamata yalewa, ka la?ki domona e dua na marama ka vari ika tiko e na nodratou matasawa, ka se tu talega na kena i vakadinadina e na gauna oqo, kei na vuqa tale.

Na macawa qo e da na wilika kina na i talanoa kei ?Kuku Vana? na nodratou Vu na mataqali ko Qalitu e na koro ko Tukavesi, Natewa mai na yasana o Cakaudrove. E vakamacalataka o Mikaele Vosayaco ni nodratou Vu talega e dau matamata yalewa sara vakaukauwa.

?O koya e na dau tu ga mai e na nona i teitei qai vakaraici ira tiko na marama mai sawana.

?Era dau qarauna sara na marama na nodra i tutu e na gauna era qoli tiko kina. Ni dua ga na marama e veisureti na nona i tutu ni qoli vei koya, e na dau vakadodoka mai o Kuku Vana na nona idoko me yaco sara ki sawana,? kaya o Mika.

Dua na siga ni se welewelei sara toka ga o Kuku Vana, e na nona cakacaka, era qai vakamuria cake na nona idoko e dua na i binibini lairo vakaitamera, ka ra katikatilaka sara ga vakaukauwa me cavuka.

E kaya o Mika ni lako vata ga na nona ladelade, kaikaila, kei na nona tauri ira na lairo o Kuku Vana, ka kolotaki ira yani ki Taveuni, Qamea, Laucala, Rabi kei Kioa.

Tomana ni levu ni nona katakata o Kuku Vana, e qai butubuturaki ira na lairo me ra kakua sara ga ni lamata cake tale mai.

?Na i vakadinadina ni i talanoa oqo, ni ra bini na lairo mai na yanuyanu e vica ka kolotaki ira kina o Kuku Vana, ia, na neitou koro e sa na bau dredre sara ga mo qai raica kina na lairo, e tu na kena qara e nakoro, ia e sa na bau dua na kelikeli vinaka mo na cakava, o na qai sotava e dua! kalougata mo na sotava rawa,? tinia o Mika.