Lamata ni oti e tinikadua na yabaki ni rakavi

SA tu vakarau na timi ni Rewa me na solia e dua na qito kaukauwa e na nodrau na veitavulaki tiko kei na timi tagane ni Navosa e na fainala ni Vodafone Vanua Championship ka na vakayacori tiko e na ANZ Stadium e na Vakaraubuka ni macawa oqo.

E vakadeitaka mai na i tukutuku oqori o Ro Alifereti Doviverata na dauniveivakatavulici ni timi ni Rewa, ka a vakadavora na timi ni Lautoka mai na Ratu Cakobau Park mai Nausori e na nodrau a semi-fainala e na macawa sa oti.

A vakavinavinakataki ira na cauravou o Doviverata e na sotasota oya, e na nodratou vorata ka taqomaka me ratou kua ni laveta na rara na timi mai na i dromudromu ni siga.

E kaya o Doviverata ni ratou sa vakanadakua na qaqa e na macawa sa oti, ka ratou sa vakanamata ki na qito dredre ka sa tu oqo e matadratou e na macawa qo.

Tomana ni ratou a sega vakadua ni bau druka e na nodratou sotasota na timi ni Navosa e na sotasota mai na muaira ni noda vanua, ia, e ratou sa biuta vata tiko e dua na i tuvatuva me rawa ni vakasota kei na kaukauwa e tiko vei iratou.

Ratou a qaqa na timi ni Rewa e na nodratou a rubilaki Lautoka e na nodrau a semi-fainala e na macawa sa oti, ka da rawa ni raica sara ga e kea na i tuvaki vinaka ni yagodratou e na nodratou vakaciciva na qito vei iratou na tuwawa lelevu mai na yasayasa Vakara. Ni oti e 13 na miniti e na i matai ni veimama e a takosova na nodratou laini ni sikoa na timi ni Lautoka na cauravou ni Naseuvou o Alivereti Veitokani, ka caqeta curu talega ki matamata me ratou liu kina na timi ni Rewa e na 7 kei 0.

Dua na nodratou veipasi tale e na i ka 21 ni miniti, a qai tabaka tale e dua na sikoa o Emoni Baleisuva, cala na kena caqe ka kauta cake sara na kedratou na timi ni Rewa e na 12 kei 0 ni voleka toka na vakacagicagi.

Ratou sega ni suka i muri na cauravou mai na i dromudromu ni siga e na nodratou sasaga toka yani ki na laini ni sikoa ni Rewa ka vakavuna me la?ki tabaka kina na polo o Viliame Satala, cala na kena caqe ka 12 kei 5 e na veimama.

E a bula tale na qito e na i karua ni veimama, ka levu sara na nodratou polo na timi ni Lautoka ka vakavuna me la?ki tabaka na polo ko Maikeli Sivo ni oti ga e vica na miniti e na i karua ni veimama, cala na kena caqe ka 10 o Lautoka 12 o Rewa.

E na nodratou vakaseretaka na nodratou toso tiko mai na i yatu e liu ni Lautoka, e a mani solia kina o revari e dua na i totogi e na ruku ni matamata ka kauta cake na kedratou kai na timi ni Lautoka e 17 kei 12.

Ni sa vakacagau tiko na qito e na i karua ni veimama, sa qai katakata ga mai e na timi ruarua ka vakavuna na nona dodosasa e loma ni rara o Baleisuva e na dua na i cumu warumisa mai vei Maikeli Sivo.

Oti oya e ratou a tabaka tale e tolu na sikoa veitaravi na timi ni Rewa ka curu kece na kena caqe me kauta cake na kedratou kai ki na 33 ka dua na sikoa nei Lautoka, cala na kena caqe ka kauta cake na kedratou ki na 22 me yacova ni oti na qito.

Sa tu na nona vakanuinui o Doviverata vei kemuni na dau tokona na timi ni Rewa, mo ni gole yani vakalewelevu e na ANZ Stadium ka la?ki tokona na nomuni timi ni vanua e na Vakaraubuka ga oqo.

More Stories