Kumuni rawa e $360,000 mai Nadroga

EA mai cegai tale e dua na drau ni veva vou ena soqo siga rua ni Adi Nadroga/Navosa ena mua ni macawa sa oti ka a caka ena rara ni koro vakaturaga o Nasigatoka ena kena mai kumuni e $483,301.70.

E tukuna o Rusiate Raidaveta na i vukevuke ni Roko e Nadroga/Navosa ni oqo e se qai dua na i lavo levu me kumuni ni vakatautauvatataki kei na soqo ni Adi Nadroga/Navosa e dau caka ena veiyabaki sa oti.

E kuria na turaga Roko  oqo e vuna ena nodra rawata vakavinaka kece na nodra yavu na ruasagavulu ka rua na tikina kei na i lavo levu era a mai doladola kina na gone ni yasana era sa vakaitikotiko tudei mai Ositerelia, Niusiladi kei Amerika ena nodra a solia e $120,665.05.

Ena vei tikina lelevu ena liu tale kina na tikina o Malolo ni a kumuna rawa e $38,499.00, karua na tikina o Cuvu ka kumuna e $26,469.20, katolu o Nasigatoka kumuna e $16,328.60.

Ena tikina lalai ea liu kina na tikina o Waicoba ni a rawata e $7,616.70, karua na tikina o Raviravi ni a kumuna e $6951.80 ka katolu na tikina o Nokonoko ni kumuna rawa e $6,808.30.

E tukuna o Raidaveta e dua na i wase levu ni lavo oqo ena vagolei ena nodra vukei na gone ni yasana o Nadroga/Navosa era vuli toro cake.

?Na yasana ena vakatabakidua nona sasaga ena kena sagai me ra susugi na luvena mera rawa ka vakavuli ena kena rawati na i vola ni vuli toro cake ka rawa ni vukei ira ena nodra tiko vinaka mai muri,? e tukuna o Raidaveta.

E kuria ka kaya e so na gone era vakuwai mai na TELS ena vei univesiti ia sa tiko na i lavo ni yasana me na tabeya cake nodra vuli.

 E tinia ka kaya e dua tale ga nai wase ni lavo ena vagolei ena kena vakatoroicaketaki na yasana.

More Stories