Koro o Jeruisalemi

AISEA 2:3 For out of Zion shall go forth the Law and the word of the Lord from Jeruishalem.

Ki-Mitzion Tetzei tora-udivar adonai Mirushlayim.

Ni na lako yani mai Saioni na i Vunau kei na Vosa i Jiova mai Jeruisalemi.

Joni 15:3
Dou sa qai samaki e na vuku ni vosa au sa vosataka vei kemudou.

Sa dina na vosa ni “Sa kalougata na yavadra era kauta voli tu yani na i tukutuku vinaka ni noda Turaga”.

Sa kalougata vakalevu cake talega ki na veivanua eso sa digitaka na Kalou mera butuka na nona tamata digitaki.

Era kalougata vakalevu cake talega na veivanua ka ra sa digitaki me tara cake kina na matanitu ni Kalou e vuravura.

Era sa kalougata ka ni ra sa okati mera tiki tudei ni tuvatuva ni nona veivakabulai na Kalou e vuravura, io oya na i tuvatuva vakalomalagi, ka sa mai vakavatukanataki e vuravura.

Ena sega ni butuki walega, ia, e sa vakavatukanataki sara ga kina na cakacaka loloma ka veivakurabuitaki ni Kalou.

Nida wilika na i tukutuku ni nona a mai liatamata na Kalou e vuravura, eda sega walega ni sarava kina na nona cakacaka mana e veivakurabuitaki, ia, era sega ni guilecava na dau volavola, mera tukuna na yaca ni koro se vanua ka vakayacori kina na ka bibi ka sa vakayacori.

Na veika a vakayacori e a sega ni vakayacori e maliwa lala, ia, e a vakayacori e vuravura.

E a yaco e na dua na koro se tiki ni vanua ka ra tiko kina na tamata.

Ni cavuti na veivanua ka a vakayacora kina ko Jisu na nona cakacaka mana, sa vakadeitaka sara ga vei keda e vica na dina.

Sa dina na nona a lia tamata na Kalou.

Sa dina na veika a vakayacori, nira yaco e na dua na vanua dina.

Sa dede sara na gauna eda sa rogoca tu mai kina na yaca ni veivanua se veikorokoro, ka a mai vakataleva voli na Turaga kri iratou na nona tisaipeli.

Eda sa rogoca tu ga na yaca, ka da sa kilai ira wale tu ga vakavosa, se ka ni vakanananu walega.

Eda sega ni kila me yacova mai oqo se mataqali vanua vakacava, se vakaevei tu na kedra i tuvaki.

Au a sa talanoataki Jeruisalemi kei Peciliema e na yabaki sa oti, ia, au vakabauta ni na via daumaka me’u na talanoataka se me’u na vakamacalataka vakaoti e vuqa sara na veivanua e a vakabutuka, ka a caka mana voli kina na Gone Turaga ko Jisu Karisito e na gauna koya, e na i Vola Tabu.

Meda kakua ni cavuti ira wale tu ga, ia, meda kilai ira ena kena matailalai duadua eda rawata, baleta oqo e na vukei keda e na noda vakadewataka vakadodonu nai tukutuku ni veika ka sa vakayacori, kevaka e matata taumada vei keda nai tuvaki ni vanua, baleta ni a sega ni digitaki ira vakailoa na Kalou.

Sa levu sara na kena i vakamacala e cacavukavuka eda sa dau rogoca tu mai vei ira e so, ia, e sega ga ni se matata sara vei keda ka ni a tukuni tu ga mai vakavosa.

Na uto ni nodra bula se vakabauta na Jiu, e dabe sara koto ga e na nodra vanua se qeletabu ko Jeruisalemi, baleta oqo na vanua e tara kina na tukadra o Solomoni na Tui na nodra valenisoro.

O koya sara ga oqo e dau vakadeitaki ira tiko na Isireli e na veigauna kecega.

Ena veiyasai vuravura cavaga era dau tiko voli kina, era dau solia tikoga mai na nodra vakanuinui vinaka, ka ra sega vakadua ni dau guilecava, mera dau solia tikoga mai na nodra dau cau tiko mai vakailavo ka me tarai cake tikoga na nodra qeletabu.

Oqo sara talega na vu ni nodra kalougata.

Na korotabu ko Jeruisalemi sa i koya na nodra i sakisaki na Jiu/Isireli/Iperiu, ka ra dau bole mate kina.

Ena i karua ni Veigauna e na Wase e ono, tikina talega e ono (II Veigauna 6:6) e kaya kina na Kalou Bula ko Jisu,” Ia, ka’u sa digitaki Jeruisalemi me tu kina na yacaqu, ka me tara talega kina na noqu vale.

Ki vei kemuni na wekaqu mai na veiyasai Viti, au na vakadeitaka tikoga na noda vakabauta e na vuku ni rarama ni vakasama oqo me baleti Jeruisalemi.

Na veivanua kece o koya e a cabe taumada kina na Lotu i Jisu e na noda vanua oqo ko Viti me vakataki Lakeba e na yabaki 1835, e Viwa, Rakiraki e na yabaki 1852, oqori sara ga na noda dui sakisaki me vakataki ira na Isireli e Jeruisalemi.

Ni da na dau vakamareqeta na veitikina tabu vakaoqo, e na dau i vurevure tikoga ni veivakalougatataki kivei keda, kei ira na noda kawa ena veisiga ni mataka.

Kevaka e tu na nomuni vakatataro ni qai qirita ga mai na naba ni talevoni veikauyaki na: 9204915/ 9590439.

E na qai kuri tale yani

More Stories