Konitarakitaki

E TUKUNA o Gareth Baber na dauniveivakatavulici ni timi ni Vodafone Fiji 7s ni sega ni kauwai ena vuku ni rogorogo e rogo wavoki tiko me baleta na nona konitaraki o Osea Kolinisau ka vakadeitaka ni na tomana tale na nodra konitaraki eso tale na dauqito.

E tukuna ni sega ni sainitaka na nona konitaraki o Kolinisau ka kuria o Baber ni oya na nona vakatulewa ga o koya ka sega ni dua na ka e rawa ni cakava kina ena vuku ni nona digidigi ga o Kolinisau.

E kuria o Baber ni sega ni rawa ni cakava kina e dua na ka me na sainitaka o Kolinisau na nona konitaraki.

Ia, e kuria na turaga ni Welesi qo ni sa vakatau saraga vei ira na cauravou dauqito na nodra sainitaka na nodra konitaraki se mera kakua ka na sega ni rawa ni vakatulewa kina o koya. E kuria o Baber ni sega walega ni o ira na dauqito era konitaraki mera qitotaki Viti e kuria ni na rawa ni ra konitarakitaki tale eso na dauqito ka na vakatau mai na nodra i vakarau ni qito. Esa tiko eso na yaca ni dauqito era sa konitarakitaki, era oka tiko kina e levu na cauravou ka ra qito oti mai na va na sotasota sa oti. Ia, era sa keba tiko ena gauna qo na cauravou vakarautaki kina timi ni Viti ena vuku ni sotasota ki Hong Kong kei na Sigapoa 7s.

Na timi ni Viti ena sota tiko kei na timi ni Japani, Welesi kei Niu Siladi ena sotasota ni qito vakatobu ena Tobu C mai Hong Kong ka na vakayacori tiko ena i ka 7 kina i ka 9 ni vula o Epereli.

More Stories