Kere veivuke o Waitui ni oti na kama

E VAKARAITAKA ko Leveni Waitui ni na vakasaqara na veivuke ena nona gadreva me tara vou tale na nona vale ni oti na kena mai kama yavu vakadua ena Vakaraubuka sa oti. E tukuna o Waitui ni a tekivu ga na kama mai na matadravu ena valenikuro ka qai teteva na vale taucoko.

?A tekivu na kama ena 9 na kaloko ena gauna e ratou a tiko kina e vale na ganequ,? e kaya o Waitui.

Nai tikotiko qo o Nakuta e volekata na koro ko Naqali ena yasana o Naitasiri ena tolo ni gaunisala me gole vaka ki Viria.

Ia, e tukuna o Waitui ni sau ni vakacaca ni kama oqo e tiko kina $25,000 ka lako vata kei na i yaya e kama ena loma ni vale.

?E rua na luvequ e rau vuli tiko ka kama yavu taucoko na nodrau i yaya ni vuli kei na i sulu ni vuli,? e kaya o Waitui.

E tukuna o Waitui ni sega ni qai dua na ka e bula ena nodratou vuki bera na vo ni vuvale ka vakaitikotiko ena i tikotiko qo e Nakuta ni sa kaukauwa na liwa ni cagi ka vakama vakadua na nona vale kau.

E vakavinavinakataka o Waitui na nodra veivuke yani eso na lewe ni koro e Naqali ena vuku ni nodratou i sulu kei na kedratou kakana.

?Au kerea ga na matanitu ke bau rawa ni veivuke me tara vou tale na noqu vale kei na i yaya ni vuli nodrau na luvequ,? e kaya o Waitui.

E kuria o Waitui ni sa biuta toka yani na nona akaude ni baqe vei kemuni ko ni rawa ni veivuke ena kena tara tale na nona vale, Westpac Bank akaude 9804253079.

More Stories