Kaulotu ki Kwoio, colo kei Solomoni

ENA nona sa laki tiko mai Solomoni mai na 2013 o Talatala Apisai Nawai, esa matai sara na vosataka na vosa na ?pidgin English? ka totoka na bula veimaliwai ena veisiga kei ira na lewe ni yavusa mai Alafe.

Ka tiko ena loma ni yavusa oqo, e rauta ni 40 na koro, ka se qai tarai ira ga e 21 na koro o Nai Talatala.

Na koronivuli ka laki tauyavutaka oqo e vakaraitaka na Minisitiri ni Vuli mai Solomoni ni ra sa tiko sara ena dua na yasa ni vanua mai Kwoio, ka vaka me ra sa guilecavi tu.

Ena i vola mai vua na Minisitiri ni Vuli mai Solomoni me tokona kina na tara ni koronivuli, a volai mai kina na i vola oqo vei Talatala.

?Being isolated the school was rarely visited by the Education Authority and likewise projects were very slow to come into place.

?However, thanks to the Fijian Missionary (Mr Apisai Nawai) for taking the lead in assisting the school in terms of material supplies.? oqori na i vola mai vei Any Siarani mai na Minisitiri ni Vuli mai Malaita, Solomoni.

Na koronivuli e voleka duadua ga mai Kwoio oya na koronivuli mai Namoia.

Na yaca ni koronivuli ka laki tauyavutaka o Talatala Apisai o Alafe Primary School ena 2013 ka ra sa yaco tiko ena Kalasi 5 na gonevuli ena yabaki oqo.

Ena Siga Tabu sa oti, esa vuka lesu tale ki Solomoni o Talatala me laki raica na kena vakadavori na paipo ni wai ki na koro o Alafe kei na koronivuli.

Ena nona raica na i tuvaki ni nodra bula o Talatala Apisai, esa votu ga mai vua ni vuli duadua ga ena rawa ni vueti ira mai na yavusa oqo o Alafe ki na dua na i vakatagedegede ni bula e vinaka kei na tiko savasava.

?Na i vola oqori mai na Malaita ena kena Minisitiri ni Vuli e mai vakamatatataki kina na nodratou tokona ka vakavinavinakataka na i tavi esa qaravi toka vei ira na wekada oqo e na colo kei Solomoni,? e kaya o Talatala Apisai.

Ena nodra i tovo ni bula, ni dua e mate, e kaya o Talatala Apisai, e olo ga ena draunikau ka vakayagataki me tara kina na nodra vale me olo kina na yago , ka bulu yani ena loma ni qara.

?Vei keda, eda vakayagataka na masi, se na ibe me olo vinaka kina na yagodra na wekada era sa liu yani.

?O ira, era sa vakayagataka saraga na draunikau ka dau vakalalagataki kina na nodra vale.? e kaya.

Tukuna ni gauna e dua e tauvimate, e dau kau tale vua na nodra bete, ka mena laki lose vua eso na draunikau, ia era cata sara me dua tale na lotu vou me na gole yani vei ira.

?Ia, e sega ni rawarawa, baleta ni caka tu ga na vunau kei na wasei ni tukutuku vinaka, esa caka tale tiko na vakadraunikau, ia sa vodi kecega baleta ni kaukauwa tikoga na Kalou eda qarava,? e kaya o Talatala Apisai.

E vakavinavinakataka na Kalou ena nodrau sa laki veivolekati sara kei na i liuliu ni yavusa o Chief Sutilega ka kaya vua na i liuliu ni yavusa oqo na vosa oqo.

?Ni kevaka ko sa mani leqa, keimami qai kerea ga na nomuni dravusa me mai bulu tu ena koronivuli oqo e Alafe ka me vakananumi tudei tu vei keimami na cakacaka levu ni veivakararamataki ko ni sa qarava. E dua na i wau e qai solia mai o koya vei au, me nona i loloma, ia e kani rarawa ni qai tarovi vei iratou na kasitaba mai Solomoni.

?Ka sa dredre na veitalatala ni keimami sa laki bula vata tu, ka?u sa okati au saraga me?u dua ga na turaga ni Solomoni.

E nona tatadra tiko o Talatala Apisai me na levu na turaga kei na cauravou e Viti me ra bole ena kaulotu baleta ni tu kina na veivakarautaki ni Kalou.

Esa vakadinadinataka o koya na veitotaki kei na veivakarautaki ni Kalou ena vanua e veiqaravi kina oqo.

Esa vakadeitaka talega e yalona ni o ira na gonevuli era sa vuli tiko ena Alafe Primary School era na vukea na kena vakararamataki na bula kei na rai ni nodra koro kei na yavusa ena veisiga mai muri.

Macawa mai qo, ena qai talanoataki yani na kena kau yani na kena ika kovu o Talatala Apisai ni sa oca na kana kumala kei na wai ena veisiga. Ni qai nanamaki mai.

More Stories