Kasere o Vatuvula kei Vatusolo

Na waqa totoka na Adventures Fiji ka dau veivakaleleci tiko e na Yatu Yasawa e na veisiga kece, e taba toka oqori e na matasawa ni koro ko Namara, Vuda mai na yanuyanu ko Wayasewa. Veitaba: VILIAME ODRO

SA MAI yala toka na noda i talanoa e na gauna era sa la’ki vakaruru toka kina e na ruku ni veivunikau e na nodra koro vou mai Naboro na lewe ni koro ko Namara, ka sa vakaloloma dina sara ga na kedra i rairai.

Ni tei wiliwili sara yani:

E kaya o Qasenivuli Vakacegu Epeli Rawaqa ni gauna e ratou qai biubiu mai kina e na koro ko Namara, sa vakavodoka rawa o koya na meteresi, na sitovu karisini kei na veika e rawa ni ratou bula toka kina vakaveitamani.

“Au sa tukuna sara vei neitou Na kei na luvequ gone yalewa lailai ni rau sa na la’ki vakavale tikoga e na neitou waqa.

“Tou sa na yaco ga yani ki Naboro, tavo na waqa ki vanua, ka sa na nomudrau vale sara tiko e na gauna ni leqa oqo.

“Na vuna o ya au sa vakavodoka kina na veika kece e gadrevi me yaco sara e na idini ni cina (generator),” kaya o Rawaqa.

Tomana ni gauna era yaco yani kina ki Naboro, sa tekivu sara na nodra tara e dua na vale ena gauna era sa sobu kece kina na i yaya ni vale mai na waqa.

Kuria o Rawaqa ni rua na generator e tiko vei koya e na gauna oya, e dua na idini ni koronivuli, ka kena i karua e nona ga.

Ni rauta toka na 7 na kaloko e na bogi, e na gauna era sa vakasoburi kece kina na i yaya ki vanua, sa qai waqa ruarua na generator, ka tekivu sara yani na tara vale.

E kaya o Rawaqa ni ra lako kece mai na matai ni tara vale, ka ra vodo tiko mai na waqa ni matanitu e rua, kei ira na cauravou ni koro ko Namara, ra sa qai tekivu tara vale e na bogi oya.

“Vakaduri na duru, lako na i sa, vakaduri na purlin, vako sara na kava.

“Na bogi tikoga oya, viavia rauta beka na 4 na kaloko e na mataka lailai, sa qai vakava oti kina na vale keimami tara tiko.

“Na vale balavu qo e rauta beka na 80 na mita na kena balavu, ka 36 na mita na kena raba” kaya o Rawaqa.

Tomana ni gauna ga e sa vakava oti kina na vale, sa tukuna sara vei ira na cakacaka tiko o Rawaqa, me ra vakacegu ka lose mada e dua na medra yaqona e na nodra koro vou. E na qai kuri tale yani

More Stories