Karoni na luveda

ESA ka bibi na nodra karoni ka tuberi vakavinaka o ira na luveda me rawa ni ra lewenivanua vinaka ena veisiga sa tu mai liu.

Ena macawa oqo e mai vakananumi tiko kina vei ira na gonevuli e Viti na ca ni kena vakayagataki na waigaga ni veivakamatenitaki me vaka na tavako, na yaqona, na mariwana kei na ceru ‘ glue’.

E kaya o Doketa Mahendra Reddy na Minisita ni Vuli ni ka bibi na nodra qarauni na luveda ka mera kua ni dau sarava tu e so na i tovo e sega soti ni vinaka na luveda mai vale.

E vakabibitaka o Doketa Reddy na nodra bucini ka vakatavulici vinaka na gone ena i tovo vinaka ka kilikili ena i matai ni koronivuli oya mai vale.

E a tukuna tiko eso na i tukutuku bibi qo o Reddy ena Kalabu Primary School e Nasinu.

E laurai ni levu sara vei ira na gonevuli e Viti, era dau mai sikalutu tiko ena vakatavako.

E rauta ni 144 na kisi ni vakatavako nodra na gonevuli e tauri rawa ena fika e tauri mai ena yabaki sa oti.

E kaya talega o Reddy ni kevaka era na vakavulici yani vakavinaka na gone mai vale, ena laki vinaka talega na nodra i tovo kei na nodra vuli ena veikoronivuli era tiko kina.

E cakacaka sara tiko vakaukauwa na Tabana ni Vulli ena gauna oqo ena kena vakayacori tiko na veivakararamataki ena noda veikoronivuli kei na veitikotiko ena ca ni kena vakayagataki na waigaga ni veivakamatenitaki.

E vakabibitaka o Reddy ni i tovo ni dua na gone, ena bucini ga mai vale, oya na vuna e sa rui bibi kina na noda vakaitovotaki keda na i tubutubu ena i tovo vinaka eso me rawa ni ra vulica ka vakamuria na luveda.

More Stories