Kamica na ika ni dela ni waisiliva

Update: 11:07AM �SA oti vakavinaka oqo e 12 na yabaki na noqu volitaka tiko na ika, nama kei na lumi e na makete levu e Suva�.

Oqori na veika e cauraka mai ki na Na i Lalakai o Marica Valelala e dua na marama ni koro ko Namuka, Bau, Tailevu, ka volivolitaki kakana buta e na macawa sa oti.

E kaya o Valelala ni gauna ga e leqa kina na nona sui ni sarisari, sa nanuma sara me sa tekivu volivolitaki me rawa ni rawati kina na bula ni vuvale, ka ratou qaravi vakavinaka kina e walu na luvedrau. Me yacova mai na gauna oqo, era sa vakawati kece e lewe ono na luvena, ka rua ga e ratou tiko vata mai nakoro, ka rau dau vukei koya e na kena vakasaqarai mai na i voli ki na makete.

E kaya o Valelala ni ika e na dela ni waisiliva e duidui sara na kena i kanakana kei na ika mai na veiyasai Viti.

�Na vuna au tukuna kina ni kamikamica na ika e siwati mai na neitou waitui, baleta ni vakarauta no ga na kena masima, ka kena i karua ni o kania oti e dua, e sa na garova tale na lomamu mo tovolea tale mada na kena i karua ka rau davo veitikivi toka e na kena pasela.

�Nomu sa tovolea na kena i karua, o na qai kidacala ga ni sa yatova tale na ligamu na kena i katolu ni ika ka tiko e na pasela, baleta na kena kamikamica,� kaya o Valelala.

E sa bau sau vinaka dina na ika e volitaka tiko na marama yabaki 64 oqo, kei na kena tuvalaki vakamatau e na kena pasela, ni ko raica ga, sa gu sara ga na yalomu mo volia.

E $5 dua na i vakarau, ka ratou tuvani tiko kina e lima na ika, dua na kena rourou vakalolo kei na tavioka.

�Na i lavo kece au rawata e na noqu i voli, e vakayagataki sara ga e na neitou bula na veitinani, na veika e gadrevi mai na vanua kei na lotu,� kaya o Valelala.

More Stories