Ka Levu o Ratu Makutu

NI qai cabe na yabaki vou, ena vula o Janueri sa na vakayacori talega na soqo ni nodra vagunuvi na Turaga na Ka Levu, ka nanamaki tu kina na vanua kei na veiwekani vakavanua ena loma ni yasana vakaturaga o Nadroga.

Oqo ni oti na nona sa vakadeitaki oti vakamatanitu o Ratu Tevita Makutu ki na i tutu oqo me vaka na veika e vakaraitaka na valenivolavola ni Roko mai Nadroga kei Navosa. Esa mai vakadeitaki vakamatanitu ena i tutu ni Turaga Bale na Kalevu ka Tui Nadroga o Ratu Tevita Makutu.

Oqori na ka e vakaraitaka na i vukevuke ni Roko e Nadroga/Navosa o Rusiate Raidaveta.

E tukuna o Raidaveta ni sa qai vo ga na vanua Yavuhahuna mera vagunuva vakavanua na Turaga na Kalevu.

?Sa vakamatanitutaki oti o Ratu Tevita ki na i tutu ni Kalevu ka sa qai vo ga na vanua mera cakava nodra i tavi,?? e tukuna o Raidaveta.

Ia ena vica na macawa sa oti era dabe kina na yavusa Louvatu kei na vanua o Yavuhahuna e Vale Levu e Nakuruvarua e Naqeledamu ena koro vakaturaga o Cuvu ka veivosakitaki kina me qai vakayacori na veivagunuvi vakavanua ena vula ko Janueri.

O Ratu Tevita e luvedra na Turaga Bale na Kalevu sa bale o Ratu Sakiusa Makutu. Era a vuli mai Vulinitu o Ratu Tevita ka dewa yani ki Niusiladi ena koronivuli rogo na Wesley College mai Pukekohe e Okaladi ni bera ni ra qai tomana nodra vuli e na Otago University. E mai cuva toka na bilo ni vanua ena gauna era mai bale kina o Ratu Kinijoji Vosailagi na i ka ciwa ni turaga me ra buli ki na i tutu vakaturaga oqo.

O Ratu Kinijoji a buli ena Okosita ni 2015, ka mai bale ena yabaki sa oti ni ra sa yacova yani na yabaki 89. Ia na nodra turaga i tubutubu o Ratu Tevita, o Ratu Sakiusa Makutu era mai bale ena yabaki 2013.

More Stories