Isevu o Hicks e Viti

Update: 12:32PM A MAI sevu ni gone ni Viti ko Carlos Hicks me rawata na i covi ni vuravura ena qito veivacu kei na veicaqe (kick boxing) ni oti e va na rauni nona vakanokari kena i sa ka a taura tiko na kenai covi ko Sam Gough mai Okaladi e Niu Siladi ena i ka 17 ni Maji.

O Hicks e a taura tiko na kuila ni Viti ena loma ni nona rumu ni veisau ka kauta vata tiko kei koya me yaco sara ki na loma ni rigi ka mai duri tu ena nona luluvu ena gauna e lagati tiko kina na sere ni matanitu ena gauna esa mai jabeni vou ni vuravura kina ni wasewase ni middleweight ena �International Kick Boxing Federation�.

A biuta e dua nai caqe kaukauwa o Hicks ena yavai Gough ka vakavuna saraga me lutu na turaga ni Igiladi qo ka mosita na yavana i matau ka laucaqe.

E tukuna o Hicks ni a marautaka sara vakalevu na nona mai isevu ni gone ni Viti me qaqa ena qito qo e dina ga ni sa vakaitikotiko mai Niu Siladi.  E rau a sota taumada  o Hicks kei Gough ena yabaki sa oti ka rau mani tai, ia a vakauqeti koya me sasaga tale ka vakaukauwa yago sara vakavinaka kila ni na rawa ni vakadrukai Gough.

O Hicks e luvei Aubrey Hicks kei Sisilia Tokona ka tubu cake mai Waiyavi Stage Five e Lautoka ka vuli mai St Thomas Primary School. A biuti Viti me gole kei na nona itubutubu ki Niu Siladi na cauravou yabaki 27 qo ni se qai yabaki 6 ka mani lesu tale mai ki Viti ka mai vuli tale e Stella Maris kei Gospel High School e Suva.

A tekivu qitotaka na qito ni veivacu kei na veicaqe ena ono na yabaki sa oti ka ni sega ni dua na gauna vua me cegu mai na nona cakacaka me rawa ni vakaukauwa yago ena qito rakavi mai Okaladi.

E kaya ni a dau vinakata me qito rakavi ka mani veicalati tiko na gauna ni nona cakacaka ka vakavuna me dredre ki na na nona la�ki vakaukauwa yago ena qito rakavi. 

Ena gauna a tekivu vakaukauwa yago kina ena qito veivacu kei na veicaqe, e a sotava sara kina na derdre, ia ni oti na i katolu ni nona qito ka qaqa kina esa mani tekivu saraga e kea na nona vakadeitaki koya ena qito qo.

E kaya ni levu na gauna e a veivacu voli ena tolo ni sala mai Okaladi ia e a sega ni bau tadra ni na dua na siga ena jabeni kina ni vuravura.

A sa qito oti vaka 39 o Hicks ena gauna e tekivuna kina na qito qo. E kaya ni nona sota taumada kei Gough e a qito tu ga yani me vaka na veibuturaki, ia ena nona mai qaqa qo e a qito kina vakaituvatuva.

A vakayagataka vakalevu o Hicks na kaukauwa ni yavana me caqeta toka kina na yavana matau o Gough ena veigauna kece. 

Ni oti na nona qaqa o Hicks a laurai ni a bibi sara na mavoa nei Gough ka vakavuna na nona sega ni lako vinaka me vodo rawa kina ena nona tolili.

A se qai vakamau oti ga o Hicke kei na nona daulomani o Naomi e Viti ka rau tiko kina na luvena e rua. 

E kaya ni dau doka tu ga na nona vanua o Viti ka ni a tubu cake yani kina, ena gauna a lagati kina na sere ni vanua o Viti ka dua na gauna bibi dina vua ka lako vata na nona vakasamataka na nona vuvale kei ira na nona i tokani e Viti ena nodra nanamaki tu ena qito oya.

E levu ga na gauna e la�ki vakaukauwa yago voli mai Jaina o Hicks. 

Ia, mai Jaina e qito vata sara o koya kei na levu na dauqito rogo mai kea ka vakavuna me matua vinaka o koya ena i walewale ni qito qo.

Ena gauna qo ena cegu tiko vakalailai okoya ni bera ni qai tekivu qito tale ka ni sa na veitaravi mai vua ko ira era gadreva me ra na bolei koya.

E namaka tale tikoga o Hicks ni na kaukauwa cake tikoga na nona qito tarava.

More Stories