Gadreva o Sikivou me mata tale ki na Bose lawa

Update: 12:17PM ENA i karua ni yabaki na kena tavoci na nomuni niusiveva na Na i Lalakai, e a tabaki koto kina na nona a la?ki vosa ko Semesa Sikivou ki Cautata.

Ni tei wiliwili sara yani:

E a la?ki vosa ka saumi taro ko Semesa Sikivou ve ira na turaga kei na marama ni Koronikalou (Cautata) kei na veikoro voleka e na Tikina vakaturaga ko Bau, Tailevu e na bogi ni Tusiti ni macawa oqo.

E vutucoqa vinaka na vale ni vuli mai Cautata, draki vinaka sara na vanua, ka mai bibi yani na soqo ni a vakayacori vei Semesa na veiqaravi vakavanua, na kena magiti kei na meke.

Ni sa vosa ko Semesa, e a vakacaucautaka taumada na qaqa kei na gugumatua nei Cautata e na kena cici tiko vakavinaka na nodra basi, ka qaqio kaya e muri ni dua bulu ga na nona yalayala.

E kaya o koya ni dau kaukauwa ka ravuravu na nodra veivosaki kei na nodra sasaga na Mata ki na Bose Lawa ni bula tiko yani vaka ko ya na nodra cakacaka na lewe ni vanua, me vaka ga na mata ni meke ka bula tiko mai dakudra na vakatara.

A qai cavuta na nona rarawataka na nodrau vosataki ka vakasewasewani na nona i tokani e na niusiveva.

E a kaya kina vaka oqo ko Semesa, ?E vakaibalebaletaki tiko ni rau tokoni au tiko e na vuku ni noqu i tutu Vakamatanitu, ka ra kaya ni na yaga vakacakacaka vei rau kevaka e rau tokoni au??.

?Ia, na neitou veikilai kei na veiwekani dredre e sa makawa, a se tekivu e na gauna ka keitou sega ni bau tadra tu kina ni na yacovi keda na Digitaki mata ki na Bose Lawa.

?Na gauna ko ya keitou a qarava vata voli kina na i Soqosoqo ni Qasenivuli i Taukei, ka sa i koya au nanuma kina ni veika ka a volai e na veva, ka ra vakatokai rau na noqu i tokani oqo me noqu tisaipeli, e sega ni vakasama vinaka, ka sega ni bau dua na dodonu lailai e ra vakavotuya.

?Na cakacaka kei na i tutu e rau sa dui tu kina e daidai, e rau a sa rawata sara ga vakataki rau mai na nodrau gugumatua kei na buno.

?E dua ga na ka keitou vau vata kina kei iratou na turaga ka ratou lewe ni noqu sala voli oqo ni keitou vinakata vata me?u bau lewe ni Bose Lawa tale mada ga e na vica na yabaki mai oqo.

?Na vosa ni veivakasewasewani ka sa caka tiko e sega ni bau vakasamataki kina ni sa i tavi ni lewe ni vanua na vakasamataka na sala kei na cakacaka, me rawa ni bula kina na vanua.

Ia, ko i keitou oqo e neitou i tutu dina ka neitou i tavi dodonu talega na colata na neitou vanua kei na neitou Turaga.

?Oqo e dua na vuna e dau votu kina e lomaqu e dua na i bole ni?u sa raica ni kune leqa tu e dua na lewe ni vanua.

?Au se bera mada ni bau vakaraitaka vakadua e na veivanua qima au sa vosa kina, ia, au sa na vakaraitaka vei kemuni na turaga kei na marama ka soqo tiko oqo.

?Na vosa ka dau votu mai na noqu vakasama ni?u raica e dua vei keda ni bikai tu e na leqa ko ya, na ?Rai tu mai, rai tu mai, o au na viriviri kemu bai?

?O ya talega e dua na vuna au vinakata kina, me vakataki iratou na noqu i tokani, me?u bau curu tale mada, ia, me?u lewe ni Bose Lawa.

?Sa ka ni rarawa dina vei au ni?u rogoca ni so na Turaga Bale era besetaki au, ia, au a lewe ni Bose Lawa tiko e na loma ni yabaki ono sa oti mai na nodra veidigitaki ga na Turaga lewe ni Bose Vakaturaga.

?Au nanuma ni?u a bau vakaitavi vakalevu e na rua na Bose Lawa sa oti, levu sara na ka au cakava ka?u yaga kina ka sega ni tabaki mo ni kila na.

?Au sa cautaka vakavinaka na noqu cau; ia, keu qai sega ni digitaki tale, au sa na marau talega ni sa na bau rawa toka e vica na noqu i tavi.

?Ia, kevaka au digitaki tale, au sa musuki au e matamuni kei na Mata ni Kalou ni?u na solia kece na noqu i gu kei na noqu kaukauwa me?u yaga vei kemuni??.

E kea e qai tukuna tale kina ko Semesa na vosa yalayala era cakava e so, ni ra yalataka na veika era kila sara tu mada ga vakataki ira ni na sega ni rawa.

?Ia, koi au, au yalataka walega vei kemuni niu na solia na noqu i gu kei na noqu kaukauwa taucoko, me kakua ni tatavutuvutu na noda kawa tamata e na gauna dredre e da donua tiko oqo kei na gauna mai muri.

?Au sega ni yalataka vei kemuni na vula ka rau vanalaka tiko oqo ko Mereke kei Rusia, baleta ni?u sega ni rawata??.

E tukuna ko Semesa ni na solia na nona veivuke taucoko e na taqomaki ni kawa i Taukei, me kua ni kasere se kasura, ka qai tataunaka vei iratou na nona i lala me kakua sara ni dua e ceuta e dua na ka duka me baleta e dua vei rau na turaga ka ratou veiqatitaka tiko oqo na i dabedabe e na Bose Lawa.

More Stories