Ena vaka na cabe:Ulunivanua

ENA sotava e dua na cabe ulunivanua ena macawa qo na timi ni Vodafone Flying Fijians ena nona na sota kei na timi ni Manu Samoa ena sotasota ni Pacific Nations Cup, me vaka e vakaraitaka o John McKee na dauniveivakatavulici.

E tukuna o McKee ni na dua na qito dredre ena vuku ni nodratou sasaga talega na timi ni Samoa me ratou na cabe cake ena qito ni vuravura.

Ia, e nuidei o McKee ena vukudra na cauravou dauqito era sa gole ena i lakolako ni qito ki Samoa ni rawa ni ratou na qito vinaka ni na yaco mai na siga Vakarauwai.

Sa liu toka qo na timi ni Toga ena 5 na poidi ena ituvatuva ni poidi ni oti na nona sota kei Samoa vata kei Viti, ka karua tiko na timi ni Vodafone Flying Fijians ena 4 na poidi.

E ratou na taqomaka tale na i covi ni PNC ke ratou qaqa se tai mai na Apia Park e Samoa.

Kevaka me druka o Viti ena vitu na poidi se lailai esa na rawa ni dabe tale e Suva na i covi ni PNC.

A sa mai kacivi talega o Frank Lomani me na sosomitaki Serupepeli Vularika ena i tutu ni naba ciwa.

O Lomani a qito tiko ena timi ni Naitasiri ka sa dau mai vakaukauwa yago vata tiko kei iratou na timi ni Viti ena so na gauna ena sota kei Itali kei na timi ni Sikoteladi.

Ia, e gade voli ena noda vanua ena gauna qo ko Sonny Bill Williams na dauqito rogo ni All Blacks kei na nona vuvale. E vakaraitaka o Sonny Bill ni a dau taleitaka na i vakarau ni qito kaukauwa era dau vakayacora na cauravou ni Viti, ni oya nai vakarau ni qito eda kilai tani kina na kai Pasivika ena noda dau qito rakavi ena kena kaukauwa.

E tukuna talega o koya ni o ira na dauqito ni Pasivika era dau vakaraitaka na kaukauwa e tiko vei keda ni oya na ka eda kilai tani kina ena Pasivika. Ia, e tukuna o Sonny Bill e marautaka ka doka o koya ni dua na dauqito ni yanuyanu me vaka ni turaga nona i tubutubu e kai Samoa.

E solia na nona vakanuinui vinaka o Williams ena nodrau qito o Samoa kei Viti ena Vakarauwai qo. Ia, e rau na sota tiko o Viti kei Samoa ena 1 na kaloko (1pm) ena Vakarauwai qo ena Apia Park mai Samoa.

More Stories