E tiko ga na luluqa

E LAILAI cake na i lavo e solia na matanitu kivei ira na i taukei ni basi ni vakayagataki na e- ticketing ni vakatauvatani kei na kena soli tiko na tikidua ( bus fare vouchers) vei ira na gone.

E tukuna na veika oqo na daireketa ni tabana ni lavo ni Minisitiri ni Vuli o Makarita Fuata.

E na gauna oqo e sa vaqaqacotaka na Minisitiri na nodratou veiqaravi ena kena sa tiko na timi ni daunifika ka ratou cakacaka vakaveivolekati kei na Minisitiri ni lavo ni matanitu.

E vakaraitaka o Fuata nira sa vakacakacakataki talega e lewe ono na i vakailesilesi me ratou na raica na kena vakayagataki vakadodonu na tikidua ni vodovodo e sauma wale tu na matanitu.

Kaya o Fuata nira sa tiko saraga o ira na i vakailesilesi era yadrava na kena oqo mai na veitikina e Viti era veilesiyaki kina.

Kaya o Fuata ni sa qai laurai ni sa via taucoko sara na veika eratou qarava tiko ena kena laurai me na vakavinakataki na tikina oqo mai na Minisitiri ni Vuli.

Ia, e dodonu me na mai caka na E-ticketing, qai sa taucoko tu na kena veitalanoa, ia, ena gauna oqo e sa mai sega ni tosoya tale na veitalanoa ni ka oqo na valenivolavola ni Vunilawa kei na Loya ni matanitu, e kaya o Fuata.

Ena dua na yabaki sa oti yani, e laurai ni sa mai vakamai na tikidua kece ni vodovodo ni basi nodra na gonevuli mai na valenivolavola ni minisitiri.

E ratou kaya na Minisitiri ni Vuli ni sa sega na vanua ena valenivolavola mera maroroi kina na tikidua oqo, ka ra sa mai vakamai kina ka sa sega tale ni dua na kena i lavelave me tiko.

More Stories