E qito vinaka o Tuisova

E DUA na gauna guiguilecavi dredre vei Josua Tuisova ena nona a vakaitavi ena timi ni Vodafone Flying Fijians ena qaqa vei Sikoteladi ena 27 kei 22 ena ANZ Stadium e Suva.

Era kaila na dauveitokoni ena veigauna kece e ciqoma kina na polo na cauravou yabaki 23 qo ka coqai ira yani na dauqito ni Sikoteladi era via vesuki ka ra dui dri kei na nona cumuti ira na kena i sa.

E tukuna o Tuisova ni dua na bolebole levu vua ena nona sota kei Sikoteladi ka ni naba lima tiko ni vuravura, ka marautaka ni a qaqa ena tekivu ni nona qitotaki Viti ena rakavi tinikalima.

Ia, e tukuna o Tuisova e vakavinavinakataka na Kalou ena nona solia vua na kaukauwa ena nona vakaitavi ena sota kei Sikoteladi.

E tukuna o Tuisova ni dodonu me ratou na vakavinakataka cake tale na nodratou qito ena vuku ni sota qo kei Toga, Samoa ka vakavinavinakataka na veitokoni ena nodratou a mai qaqa vei Sikoteladi.

More Stories