Duavata tiko

ENA vakarorogo tiko na Minisitiri ni Qito ena tuvatuva eratou na biuta mai na soqosoqo ni rakavi ena vuku ni lavo e gadrevi kei na veika tale e gadrevi ena vuku ni nodratou vukei na noda timi rakavi leyavitu.
Ia, e kaya na Minisita o Laiseania Tuitubou ni dodonu meda na duavata tikoga kei ratou na noda cauravou ena vuku ni nodratou vosota vakadede na veika eratou sotava tiko mai ena gauna ni nodratou qito.
Oya na veika e tukuna na turaga Minisita ni Qito kei na Tabagone ni oti na nodratou qaqa na timi ni Fiji Airways Fiji 7s mai Sigapoa ena mua ni macawa sa oti.
“Me da vakavinakavinaka tikoga vei ratou na cauravou ena nodratou qaqa veitaravi mai oqo, ena nodratou vosota tiko mai vakadede na vosa e rogo tiko, na vakalelewa e yaco tiko,” e kaya o Tuitubou.
E kuria o Tuitubou ena gauna qo esa laurai na vinaka ni timi kei na nodratou sa rawa ni veikilai vinaka na cauravou ka sa kila talega o Gareth Baber na dauniveivakatavulici ni timi ni Viti na nona biuti ratou vata na cauravou me rawa ni dua na walewale se tuvatuva ni qito e vakayacori me rawa kina na qaqa.
“Na vo ni veitimi lelevu era qito tiko oya e tu vei ira na i lavo kei na veika ni vakaukauwa yago vinaka, na noda matatimi e sega ni yacova sara na veika era vakayagataka na veitimi lelevu eso ia e rawata rawa tiko me vakadrukai ira na timi lelevu qo kei na nona vakayagtaka vinaka na taledi e tiko kei na nodra qitotaka na rakavi ena yalo e marautaka.”
A tovolea na Nai Lalakai me veitaratara kei John O’Connor na daunilewa ni FRU, a mani sega ni rawa ka ni sega ni saumi rawa mai na talevoni.
Ena gauna qo esa liu sara tiko na timi ni Viti ena tuvatuva ni poidi ena 145, ka tarava tiko o Sauca Aferika ena 141, ka tolu tikoga o Niu Siladi ena 120, tarava sara o Ositerelia ena 108, tarava o Amerika (USA) ena 93 na poidi kei Kenya ena 93 talega na poidi.
Ia, ena sotasota ni rakavi lewe ya vitu mai Lodoni e liutaka na Tobu A o Viti ka na qito tiko kina kei na timi ni Niu Siladi, Sikoteladi kei Argentina. Ena Tobu B ena qito tiko kina na timi ni Ositerelia, Spain, Welesi kei na i ka 16 ni timi esa bera ni vakadeitaki tiko.

Ena Tobu C ena qito tiko kina na timi ni Igiladi, Kenya, USA kei Varanise. Ena Tobu D ena qito tiko kina na timi ni Sauca Aferika, Canada, Samoa kei Rusia.

Na sotasota ni rakavi lewe ya vitu mai Lodoni ena vakayacori tiko ena i ka 3 kina i ka 4 ni Jiune. Na sotasota ni rakavi lewe ya vitu mai Parisi ena vakayacori tiko ena i ka 10 kina i ka 11 ni Jiune.

More Stories