Druka mai Amerika

Update: 11:00AM NA i otioti ni sikoa e a tabaka na timi ni Argentina XV a vakavuna me ratou qaqa kina vei Telecom Fiji Warriors ena 27 kei 26 ena sotasota ni Americas Pacific Challenge.

A liu tu na timi ni Argentina ena i matai ni veimama ena 17 kei saiva ena rua na sikoa veitaravi mai vei Juan Gonzalez kei na wigi ko Julian Dominguez.

E ratou mani ravu lesu mai na noda cauravou ena i karua ni veimama ka ratou tabaka rawa nai matai ni nodratou sikoa ena i ka 48 ni miniti mai vei Lepani Raiyala ka tabaki rawa nai karua ni nodratou sikoa mai vei Ifereimi Tovilevu na wigi ka caqeta curu na kena i caqe ko Alivereti Veitokani.

A tabaka na i karua ni nona sikoa ko Raiyala ena i ka 61 ni miniti ka caqeta curu o Veitokani me liu kina o Viti ena 19 kei 17.

A caqeta curu e dua nai totogi ko Gonzalez ena i ka 67 ni miniti me liu kina o Argentina ena 20 kei 19 ka tabaka nai katolu ni nona sikoa o Raiyala me liu kina o Viti ena 24 kei 20 ka caqeta curu na kena i caqe o Veitokani ena 26 kei 20.

E ratou sega ni vakasuka na cauravou ni Argentina ena nodratou sasaga nai yatu e liu ka tabaka rawa kina o Pedro Ortega e dua na sikoa ena i ka 84 ni miniti ka vakavuna kina me ratou mai taukena kina nai covi ni 2016 World Rugby Americas Pacific Challenge.

A mai karua o Viti ka i matai ni gauna me ratou mai druka kina ena Ceva kei Amerika me tekivu mai na tolu na yabaki sa oti ena nodratou dau mai qito e kea.

More Stories