Dredre toka

ESA mai kacivi o Keponi Paul na ‘hooker’ ni timi ni ovisa (Police) me lewena na timi ni Fiji Airways Fiji 7s ki na sotasota ni Sigapoa 7s ena sotasota ni HSBC World Rugby Sevens Series ena mua ni macawa qo.

E ratou veitomani talega ena timi ko kavetani Jerry Tuwai, Isake Katonibau, Keponi Paul, Sevuloni Mocenacagi, Mesulame Kunavula, Josua Vakurinabili, Kalione Nasoko, Paula Dranisinukula, Waisea Nacuqu, Amenoni Nasilasila, Vatemo Ravouvou, Eroni Sau kei Alasio Naduva.

E tukuna o Gareth Baber na dauniveivakatavulici ni timi ni Viti ni tauvimate tiko o Ravouvou, kevaka me sega ni bula vinaka rawa, esa na rawa ni curu mai me veisosomitaki ko Teri Tamani mai na timi ni Tabadamu me i ka tinikatolu ni dauqito.

E tukuna o Baber ni na dredre toka na qito mai Sigapoa ena vuku ni nona na tovolea tiko o Viti me na liu ena tuvatuva ni poidi. Ia, na veika oqo e na vakayaloqaqataki iratou na cauravou me ratou na vakarautaki iratou vakavinaka ena kaukauwa kei na kila vakauasivi na i tuvaki ni nodratou vakasama ka vakauasivi me ratou na kila tiko ni sa voleka tale tikoga mai na sotasota ni World Cup 7s.

Na timi ni Viti ena sota tiko kei Japani ni oti na 5 ena 36 na miniti (5:36pm) ena yakavi ni Vakarauwai. Ena sota tiko kei Rusia ni oti na 9 ena 2 na miniti (9:02pm) ena bogi ni Vakarauwai ka na qai sota tiko kei Spain ni oti na 12 ena 28 na miniti (12:28am) ena Siga Tabu.

Na sotasota ni kota fainala ni bilo ena vakayacori tiko ni oti na 4 ena 30 na miniti (4:30pm) ena Siga Tabu, ia na semi fainala ena tekivutaki tiko ni oti na 8 ena 50 na miniti ena Siga Tabu kei na fainala levu ena 12 na kaloko ena bogi levu.

More Stories