Donu o 9,7,6

ME vinaka ga o siqeleti naba 9, 7, kei 6 sa na vinaka sara na nodratou qito na vo ni lewe ni timi. Oya na veika e vakaraitaka toka ko Vula Dakuitoga na dauniveivakatavulici e liu ni timi ni Fiji Bati.

E vakaraitaka na turaga yabaki 52 qo ni ratou sa qito vinaka ga mai na cauravou ratou daramaka tiko na siqeleti esa vakaraitaka toka e cake sa na taladrodro na mata ni meke ena loma ni rara me vaka e na nodratou sa vakaraitaka oti na noda cauravou lewe ni timi ni Bati ena sota kei Welesi ka ratou mai binia kina e dua na kai vakaitamera.

Ni oti e rua na qito qo ni Bati au marautaka na veika e ratou sa yacova na noda cauravou, e dina ga ni a mai mavoa o Kane Evans esa mai dolava talega e dua na katuba vua tale e dua na dauqito me qito,? e kaya o Dakuitoga.

E tukuna na turaga ni Bagasau qo mai Cakaudrove ni timi vinaka dina e qito tiko qo ka dodonu meda na tokoni iratou ena vo ni qito esa koto e matadra na noda Bati.

E kuria ni nuitaka ni na rawa ni vakaqitori ira kece na nona cauravou o Mick Potter na dauniveivakatavulici ni Vodafone Fiji Bati ka me rawa ni qai vakadeitaka na cauravou me ra na qito ena kota kei na semi fainala.

E ka marautaki ni ratou sa cabe rawa tiko ki na kota fainala ka?u solia na noqu vakanuinui vinaka ena nodratou na sota qo kei Itali,? e kaya o Dakuitoga.

E kuria na turaga vasu ni Nakorovatu qo mai Naitasiri ni timi vinaka na timi ni Itali ka ni ra qito tiko kina e vica na cauravou sa qito dede tiko mai ia e nuitaka ni na cava na qito e ratou na lagilagi na noda cauravou.

E kerea tale tikoga o Dakuitoga na noda veimasulaki vei ira na cauravou.

Ko Dakuitoga a tekivu lewena na timi ni Fij Bati mai na 1993 ka kavetanitaka na timi ni Bati ena 1998 me yacova na 2001.

A dauniveivakatavulici ni timi ni Bati ena 2002, 2003 ki na 2004.

Na gauna e dauniveivakatavulici tiko kina ia e qito tale tikoga o koya. Ena gauna qo esa dauniveivakatavulici tiko ni timi ni Nadera Panthers kei na timi vakarautaki ni Nasinu zone.

E na sota tiko o Viti kei Itali ni oti na 9 ena 40 na miniti ena yakavi ni Vakaraubuka mai Canberra.

More Stories