Domo ni Parofisai mai na Lotu i Kavitu

ESA koto oqo era na i kuri ni itukutuku ni Domo ni Parofisai mai na Lotu ni Kavitu ni Lesu Vakarua Mai, ni wiliwili sara yani.

b. Dausiga (Leqa ni Kakana)

Ni sa caka nai valu sa yaco mai na dausiga ka ni sa vakaleqai na i teitei.

Na waluvu talega e sa dau vakacacana sara vakaca na veivale kei na veiteitei levu e na veibuca.

E na so na vanua e na kena rui mamaa mai na draki e qai dau vakaleqa sara vakaca na veika e tei.

Na veika oqo sa i vakatakilakila ni voleka na lesu mai i Jisu.

E sega ni vakarautaka na ka oqo ko Setani, ka sa qai dau vakatubura e levu na veileqa lelevu me yacova tu na noda vuravura.

Ia sa dodonu vei keda me da sa vakarau ga kina rairai mai i Jisu, ka nuitaka na nona veimaroroi ena vukuda.

c. Na mataqali Tauvimate

E a yaco e dua na matetaka levu ena gauna ka oti kina nai matai ni valu levu.

Era mate kina e 18,000,000 na tamata.

Nai wiliwili oqo e sivia nai wiliwili ni kena a mate e na buca ni valu.

Ia, e daidai sa qai levu ga na veimataqali mate dewa.

Era milioni era mate tiko kina ena veiyabaki.

Oqo tale e dua nai vakatakilakila levu, ia era lewe vuqa era sega ni via vakabauta ni sa voleka mai ko Jisu.

E na toso cake tikoga na leqa kei vuravura, ka na vaka kina na mate dewa. Ia, me da kakua ni rere ni na maroroi keda ko Karisito.

d. Uneune

Oqo tale e dua na vakatakilakila levu sara.

E na gauna e a bula voli kina e vuravura ko Jisu e rauta ni vica wale na uneune lalai ka bau yaco kina.

Ia, e na i otioti ni gauna oqo e na levu cake sara.

E na 100 na yabaki sa oti e rauta ni 3000 na uneune e yaco kina.

Na uneune ka yaco mai Japani ka cabe kina na sunami, ka lewe levu era vakayalia na nodra bula.

Ena nomuni daurogoca ena walesi na veitukutuku me baleta na uneune, dausiga, tauvimate, e rawa mo kaya ni oqori sa baci dua tale nai vakatakilakila ni sa voleka nai vakataotioti kei vuravura.

Sa voleka mai ko Jisu, sa dodonu me’u vakarau kina, ka vukei ira talega na wekaqu me ra vakaitavi vei Koya nai Vakabula.

Ena lesu tale mai ko Jisu kina vuravura oqo.

E na qai lako mai ni sa kacivaki oti ki vuravura taucoko nai tukutuku vinaka.

Sa noqu masu me vukei keda na Kalou ena noda wilika, vakabauta ka muria na nona vosa.

Ena qai tomani tale yani.

More Stories