Dolavi na vale ni vakatawa e Kalokolevu

NA cakacaka ni veivakatorocaketaki e cakacaka ni veitauriliga kei na solesolevaki, kei na veilomani me rawa ni rawati kina na veika vinaka.

Oqori na veimala ni vosa e cauraka toka e na loma ni valenisoqo mai na koro ko Kalokolevu na Talai Veivuke e na i Wasewase e Loma o Setareki Tale ni vakarau dolava na nodra vale ni Vakatawa na koro oya e na siga Vakaraubuka ni macawa sa oti.

E kaya o Tale ni sega soti ni vinaka ke gole ga yani na matanitu, ka la’ki tara sara na nodra vale ni Vakatawa , e na kamikamica ni ratou cakacaka vata se veitauriliga vata na Vanua, Matanitu kei na Lotu.

Tomana o tale ni vakavinavinakataki ira na lewe ni koro o Kalokolevu e na nodra ligavata ka domoduataka na kena tarai cake na vale ni Vakatawa.

Kuria na nona vakamacalataka na tiki ni Vola Tabu na (Marika:10), a ya ni da wasea na noda i yau me vakayagataki e na cakacaka ni Kalou, e na vakayadrautaki vei keda na kena i sau.

‘E na vakayadrautaki na vanua, e na vakayadrautaki ki na veivuvale yadua, e na vakayadrautaki na loma ni yavusa vakaturaga.

‘Au vakabauta e na veiveisau ni gauna e da sa lakova tiko oqo, sa yaga me da vakananumi e na draki ni bula e ra dau cakava na noda qase, ka sa vaka me cawadru tiko yani e ligada e na gauna oqo,’ e kaya.

Kuria o Tale ni vaka me sa kune votu tiko mai na bula vakararavi e na veikoro e na noda vanua e na gauna nikua.

Tomana na mala ni vosa e dau tukuna wasoma o Talatala Ili Vunisuwai, a ya ni kevaka e da sa malumalumu tiko na kawai i Taukei, eda sa na vakabobulataki tikoga e na noda vanua.

‘Era sa na lako mai na vulagi, ra mai vakayagataka na noda i yau bula, na noda qele kei na noda i qoliqoli, ka sa da qai cakacaka tale vei ira na vulagi e na noda vanua ka da a taukena tikoga.

‘Vakabauta ni oqo na bolebole levu, ka’u sa bolei kemuni kina na kawa i taukei e na gauna nikua.

‘Na veika e solia vei keda na Kalou e kena i balebale me da yaga kina e na veigauna mai muri, e sega ni tutuga e soli mai na mana ki vei keda.

‘Sa dodonu me na cakacakataki, e na yaga me qolivi na i qoliqoli, e na yaga me cakacakataki na qele,’ e kaya.

Kuria o Tale ni veika era rawata na vulagi e na noda qele na i Taukei e levu sara na i lavo, ka lailai wale sara na veika e da taura na i taukei dina ni qele.

E bolei ira talega na cauravou e na koro ko Kalokolevu na Talai Veivuke ni dodonu me ra cakacakataka na nodra gauna, ka vakarautaka na nodra dua na i katolu, ka qai kuria na rua na i katolu na matanitu me rawa ni tara kina e dua na nodra vale ni se bera ni vakayacori na vakawati.

Kuria o tale ni gauna oqo e sa sega na vakabuta kuro me vaka era a dau cakava na qase e na gauna e liu.

Oya me ra dau cakava rawa e dua na cakacaka e na nodra veiteitei ni se bera ni vakayacori na katalau.

E kaya talega o Tale ni gauna oqo era qai qiliqilimata mada ga mai na cauravou ni sa 11 na kalokoe na sigalevu, a ya ni qai maca toka na wainivanua e na tolu na kaloko e na mataka lailai.

Tinia na nona vosa o Tale ni kevaka me ra veilomani ka cakacakavata tikoga vakaoqo na lewe ni yavusa o Natauvakarua e na sega ni vakataratutu ni vica ga na yabaki mai oqo e sa na sosomitaka na vale kau ka dola na siga oya, e dua na vale buloko vakaitamera.

Ia, e vakamacalataka o Leone Koroisalili na Turaga ni Koro ko Kalokolevu ni sau kece ni vale ni Vakatawa e $25,000.00.

Kuria ni ratou a solia na koro e $6,000.00 ka ratou qai vakuria na matanitu na kena vo.

Tomana na Turara Levu ni nodratou Tabacakacaka ni ratou qai veivuke na koro e na saumi ni nodratou matai kei na rua na nona liga ni cakacaka e na loma ni vula tolu e ratou tara vale voli kina.

‘Keitou sauma talega na kedratou kakana e na veisiga ni nodratou cakacaka.

‘Au vakavinavinaka vakalevu vua na noda Paraiminisita, na Talai Veivuke e na i Wasewase e Loma kei ira kece na i vakalesilesi vakamatanitu e na nodra yaco rawa mai e na siga e dai e na soqo lagilagi oqo,’ e kaya.

Kuria o Koroisalili ni gauna oqo e sa oti kina na nodrau veiqaravi na vanua kei na matanitu, ka sa soli vakatabakidua na vale ki na Lotu me lewa ka yacova ni rusa na vuravura.

Era a yacoyaco vata yani na lewe ni koro ko Kalokolevu e na veimama ni tini na kaloko e na mataka lailai ni siga Vakaraubuka ka ra la’ki veiwaraki toka e valenisoqo ni bera ni ra qai tadu yani na vulagi dokai kei iratou na nona i lawalawa e na 11 donu na kaloko.

Ni vakayacori oti ga e dua na Lotu mai vei Ifereimi Nadavo na i Talatala ni Tabacakacaka, sa vakayacori sara na veisevusevuti mai na yasana ruarua, gunuvi oti na yaqona ni bera ni qai vakasalusalutaki o vulagi dokai.

Oti o ya sa dua sara na nona vosa lekaleka ni veivakadreti vulagi dokai ni bera ni ra qai kerei na lewe ni yavusa me ra gole cake ki na vale ni Vakatawa me la’ki dolavi ka vakatabui talega.

Na gauna e sa yaco kina na i lakolako ki na vale ni Vakatawa, e cabora tale e dua na masu o Talatala Nadavo ni bera ni qai dolava na vale na Talai Veivuke e na Wasewase e Loma.

Oti na kena dolavi na vale era sa qai curu na i talai ni Kalou kei na vulagi dokai ka ra la’ki tabaka na veiyaya e tu e loma ni vale ni bera ni qai vakacabora tale e dua na masu o Talatala Nadavo me vakatabui kina na loma ni vale kei na kena tautuba.

Na gauna e sa vakayacori oti kece kina na veika oqori, era sa qai lesu tale na vulagi dokai kei iratou na nona i vakalesilesi kei ira na lewe ni yavusa e na valenisoqo, ka la’ki tubera tale e dua na kamunaga o Koroisalili ki vei Talatala me i soli ni vale me sa lewa vakadua na Lotu ka ni sa mai cava e keya na vanua kei na matanitu.

E mimiri vakamalua na uca matailalai ni veivakalougatataki e na gauna e sa vakayacori oti kina na veiqaraqaravi vakavanua ni kena soli na vale, ka sa i vakaraitaki ni veivakalougatataki mai Lomalagi, ka na i vola tukutuku e na koro ko Kalokolevu me ra kila na i sausau vou e ra qai tubu cake tiko mai ni dua na i solisoli tudei era a solia na nodra qase me baleta na Lotu, ka na sega tale ni dua me na kalia laivi mai me yacova ni rusa na vuravura.

Ni oti oya, sa qai vakarautaki mai na veimataqali coi ni ti me ra vakayagataka na tiko rawa e na siga oya, ka sega tale ga ni cegu na kena waivuvu totoka, ka ra qai veisameni toka na veiwekani me yacova ni sa la’ki dre ko Malolo.

More Stories