Dina kei na masu

Update: 10:19AM E levu na i talanoa e dau kaburaki se tabaki ena tabana ni tukutuku, ena dau vakavure vakasama vei keda, ka dau tuberi keda talega ni sega ni dua na ka e dredre, kevaka eda vakabauta na Kalou ka cakacakataka na veika e da dau tatadrataka tu.

Mai na vanua levu o Mereke, e dua na veiwatini e rau sa marautaka voli tiko na yabaki 80 ni nodrau bula vakawati.

E levu na gauna e da sarava ka raica na vuvale era sotava na kavoro, kei na bula ni veitawasei.

Ia, mai Michigan, e tabaki ena tabana ni tukutuku na CBN, ni rau marautaka toka o rau na veiwatini oqo o Donald kei Vivian Hart na i ka 80 ni yabaki ni nodrau bula voli vata mai vakaveiwatini.

Erau sota ka bucini na veiwekani ena oti ga e dua na soqoni vakalotu, ni oti e dua na mataka ni Siga Tabu.

Ena gauna oya, e dau vakabibitaki na bula ni masu kei na kena wiliki na Vosa ni Kalou. 

Ia, na nodrau i vakasala na veiwatini oqo vei ira na veiwatini vou, oya me da dau marautaka na noda bula vata ena veisiga, nanuma me bucini e dua na veiwekani ena dina, ka bibi duadua me da na cakava tiko na veika e donu ena mata ni Kalou.

Ena gauna oqo erau sa yabaki 99 ruarua, ka rau vakamau ena 1937.

Tukuna o Vivian, ni dau segata ena nona bula, me dau vakaliuca na Kalou ena nona bula ena veisiga.

E vosa talega ni vakasala vei keda na marama me da dau tu vakarau me da vukei ira na watida ka meda kidava tiko na veika kece e yaco wavolita na nomudrau bula. E kuria na marama oqo ni veimataka kei na bogi ni bera ni rau moce, e rau na dau masu vata vakaveiwatini, ka sega ni rau dau galeleta na veitalanoataka na leqa se na veika ena sega ni kauta mai e dua na ka vinaka.

More Stories