Digia donu nomu matai

Update: 11:50AM E ratou sa veivakaroti tiko yani na Matabose ni Dauveivoli vei kemuni na lewe ni vanua, mo ni qarauna vinaka sara e dua na kabani ni tara vale ka yacadratou taumada na Melbourne Building Works (MBW), ka sa yacana vou tiko e na gauna oqo na, Melbourne Works Limited (MWL).

Na kabani oqo e vakatabakidua na nona cakacaka e na tara vale, na kena vakavinakataki na loma ni valenikuro, ka vakakina na loma ni vale ni volavola. 

Sa vuqa sara na kudru e gole ki na kabani oqo e na gauna e ratou veivakaroti kina na Matabose ni Dauveivoli �Consumer Alert� ki na tabana ni tukutuku e na vula ga ko Okosita ni yabaki oqo. Sa ririkotaka tiko na Matabose ni Dauveivoli ni ra sa lasutaki tiko na dauvolivoli ni toso vinaka tiko na Melbourne Building Works ka se taura tu madaga e udolu vaka udolu na dola mai vei ira na lewe ni vanua. 

E na nodratou vakadidike na Matabose ni Dauvelivoli ki na valenivolavola ka ra dau rejisitataki kina na vei kabani (Office of Registrar of Companies), e qai vakadeitaki mai kina ni Melbourne Building Works e sa mai tasevu na nodratou kabani e na i ka 27 ni siga ni vula ko Okotova e na yabaki sa oti, ia, mai na i ka 30 ni Okotova tale tikoga e na yabaki sa oti, e sa rejisitataki kina e dua na kabani vou ka yacana na Melbourne Works Limited. 

Kuria na Matabose ni Dauveivoli ni o rau ruarua na kabani oqo e kedrau i Liuliu tikoga o �Manoj Kumar Parekh�. 

Ia, na kabani vou na (MWL) e tiko tale e dua na i liuliu ka rau cicivata tikoga kei Manoj Kumar Parekh. 

Me yacova mai na gauna oqo, e ratou sa ciqoma oti e 23 na kudru me baleta na kabani na Melbourne Building Works, na Matabose ni Dauveivoli, ka yacova sara tiko yani na $127,505 na i lavo e ratou taura mai vei ira na lewe ni vanua. 

E na dua na kudru ki na Matabose ni Dauveivoli, e vakaraitaka mai kina na lewe ni vanua oya ni a sauma e $11,850 ki na kabani e na i ka 5 ni Veverueri e na yabaki ga oqo, ka soli mai vua e dua na risiti e na ruku ni yaca na Melbourne Building Works. 

Na risiti oya e tiko e na yaca ni kabani ka sa sega ni rejisitataki tiko e na kena vale ni volavola.

E a vakayagataki na i lavo oya e na kena tara na nona vale ni kuro na lewe ni vanua oya me tautauvata na i vakatagedegede ni vale ni kuro mai Ositerelia. Tomana na Matabose ni Dauveivoli ni a tekivu na cakacaka oya ni oti e 17 na macawa na kena soli na i lavo, ia, na gauna e sa oti kina e a qai sega ni duavata o taukei ni vale kei na cakacaka e ratou cakava na kabani. 

Oqo e na nona kudruvaka ki na Matabose ni Dauveivoli ni sega ni tautauvata na i taratara ni valenikuro mai Ositerelia me vaka na veika e a vinakata.

E a vakatututaki na kudru oya ki vua na i Liuliu ni kabani, ka dodonu me soli tale vua na i taukei ni vale e $4000. 

Ia, e ratou sega ni via vakasuka na nona i lavo na kabani. 

E dua tale na lewe ni vanua e kauta na nona kudru ki na Matabose ni Dauveivoli e na nodrau a sauma e $11,000 ki na kabani vata ga oya e na kena vakavinakataki na nodrau vale ni kuro. Na uma i lavo oya e a solia na lewe ni vanua ki na kabani e na i ka 11 ni siga ni vula ko Jiulai, e na yabaki oqo, ka sega ni vakaoti na cakacaka, dina ga ni ratou tukuna na kabani ki vua na i taukei ni i lavo ni na oti na cakacaka e na i ka 18 ni Okotova ni yabaki tikoga oqo.

Ia, na veika oqo e a sega ni yaco ni sa vakanuinui tiko o i taukei ni vale, baleta ni na so tiko na nona vulagi e na gauna ni Diwali.

Qo e sa qai dua na ka vakamadua levu, ka ni na sega ni rawa ni ratou na vakamarautaki nodratou vulagi e na i vakatagedegede ni vale ni kuro ka tatadra taka voli mai.

Na i katolu ni kudru e gole yani ki vei ratou na Matabose ni Dauveivoli, oya e dua na i soqosoqo mai vanua tani ni ratou solia ki na kabani na Melbourne Building Works e $12,556 e na vula o Tiseba ni yabaki sa oti me vakavinakataki kina na nodratou vale ni volavola, ia, me yacova mai na gauna oqo e ratou se bera ni taura kece na veika e ratou lavaka. 

O iratou na kisi tolutolu oqo, e solia tiko na i Liuliu ni kabani na risiti ni kabani na Melbourne Building Works- ka sa mai oti na nodratou konitaraki e na yabaki sa oti. E na nodratou vakadidike na Matabose ni Dauveivoli e sa vakadeitaki kina ni sa voroka na lawa ni veivoli na kabani oqo e na ruku ni lawa e na Commerce Commission Dikiri 2010 – (tabana 88(1) (a)1. 1 tabana 88(1) e vakaraitaka: �Sa tabu vua e dua na tamata, me taura e dua na i lavo se veivoli, se dua na ka ni veivaqumi, e na gauna ni vei dinadinati – (a) na tamata oqo (i) e sega ni vakayacora na kerekere; se (ii) e sega ni vakacegua vinaka na i taukei ni i lavo 

E dua na neitou kauwai, oya ni o ira na dau volivoli era sa vakacalai sara ga mai na kamikamica ni gusu e tiki vei Liuliu ni kabani kei na kaukauwa ni nona vesu mona e ra rawai sara ga kina na dauvolivoli. 

Tomana na Matabose ni Dauveivoli ni oqo sara ga na butako vakasigalevu tutu, ka ratou sa kerekere tiko yani kina ki na tabana ni liga ni lawa me ratou vakayacora vakatotolo e dua na ka ki na kabani oqo. 

E sega tiko ni bera oqo ni se bera ni baci vesumonataki ira tale na dau volivoli, ka ra na qai coko sara kina e dua na i wiliwili ni lewe ni vanua levu

Keitou sega ni vinakata me dua tale e baci mai lasutaki keda na lewe ni vanua me vakataki Mukesh Naidu ka rau sa sota tiko oqo kei na liga ni lawa e na nona lasutaki ira na dau voli qele.

O Mukesh Naidu e dua ka a qoqota na i lavo levu e rauta ni $3 na milioni e na nona volitaka toka na vei tiki ni qele mai Tacirua, e so na qele e volitaka vakarua, ka so e vakatolu sara.

Keitou sa kerei kemuni talega na Tabana ni Tukutuku me da veivuketaka na nodra ceburaki na mataqali kabani vakaoqo.

E dodonu me da veitokonitaka na ka vinaka me ra vukei kina na dauvolivoli, ka sega ni tautauvata na dau ni bisinisi, ka via veilewaitaka na Tabana ni Tukutuku. 

E a vakayagataka mai o koya na nona loya me vakarerea kina na Tabana ni Tukutuku kei na Matabose ni Dauveivoli

Keitou na tutaka tikoga na dina ka sega ni via vakarorogo kina dau ni bisinisi ka via vakalala na nodra taga na dau volivoli, keitou sega tale ga ni dabe wale ki vei ira na kabani e ra via coqa na neitou vakatulewa. 

Ni sa vakaroti yani na dauvolivoli ka ko ni sotava tiko na leqa vata ka tautauvata kei na Melbourne Building Works mo ni kauta vakadodonu mai na nomuni kudru ki na neitou vale ni volavola, se qiri wale mai ki na naba ni talevoni na 155, ka keitou sa tu vakarau me keitou vukei kemuni.

More Stories