Dauteitei gugumatua o Sinumila

EDA na sotava mada e liu na dredre, kana vakaca, kei na veika rarawa ni bera ni da qai kunea na marau kei na tiko vinaka.

E vakadeitaka mai na veimala ni vosa oqori o Josevata Sinumila na cauravou ni koro ko Draubuta, Tokatoka e Tailevu ka a qaqa vei ira na i taba gone dau teitei gugumatua duadua (young farmer of the year) e na yabaki oqo.

E kaya o Sinumila ni tekivu na nona teitei e na nona vakere i tei wavoki me rawa ni tea, ia, e na gauna oqo, e sa kana ga mai na buno ni yadrena, ka sa volivolitaki tiko e na makete e Suva, Nausori kei Nabua.

Kuria na cauravou yabaki 26 oqo, ni tea tiko e na gauna oqo na tavioka, dalo, kaveti ni jaina, kaveti olo, baigani kei na veimataqali kakana draudrau ka totolo na kena matua.

‘E liu au a dau siviyara tu ga e na bulumakau, ia, ni sa toso tiko na gauna ka tawa vakamalua tiko mai na noke, au sa saumi ira na cauravou e na gauna e tei kina e dua na loga ni tavioka, ka’u sauma talega na katavila me siviyara taka na noqu vanua.

‘Na i lavo au rawata e na noqu teitei e cawiri tale tikoga e na kena voli e so na veika au vinakata, ka vakakina na i sau ni kakana e vale,’ e kaya.

Sa nona i vakasala ga o Sinumila vei ira na i tabagone e na gauna oqo, a ya mo ni vakayagataka sara vakavinaka na nomuni gauna, yadra vakamataka, ka okata na nomu teitei me vaka ga e dua na cakacaka.

E tiko na gauna ni tekivu, cegu e na tini na kaloko, cakava kina na nomuni cakacaka e vale, ka qai la’ki tekivu tale ni sa malumu na matanisiga.

Tinia o Sinumila ni na saga sara vakaukauwa me toso cake tikoga na nona teitei, ka me na taura tale na i cocovi e na yabaki mai oqo.

More Stories