Coi ni ti lutu bi vinaka

LEVU sara na i cakacaka ni veimataqali coi ni ti eda dai la’ki tovolea e na veisoqo eda dau gole kina.

Dua na i coi ni ti totoka keitou a la’ki tovolea e na i golegole vakacakacaka ki na koro ko Nakavika, e na tikina ko Wainikoroiluva, mai na yasana ko Namosi e na macawa sa oti, e duatani duadua vei ira na i coi ni ti eda kila levu tu e na gauna oqo.

Nai coi ni ti oqo e sa bau wadrega, kamikamica qai mai lutu bi yani ni ko sa tovolea rawa e dua.

Ni da sa tovolea, eda sa na vinakata sara ga me da vakaotia na i coi ni ti o ya e na veleti e biu toka mai kina.

E madua ga na pie kei na bisikete vakabata, e na veleti e soli mai vei keitou ka ni ra se wadra tu ga sa cagina tale na icoi ni ti o ya.

E kaya o Maritina Venina e dua na marama ni koro ko Navunibau, Namosi ka dodomo cake sara yani ki Nakavika, ni coi ni ti o ya era a dau cakava ga mai na nodra qase e na gauna e liu.

“Qo e na kena yacai na jaina vou, yacai talega na tavioka, kari na niu, qai mai wakivata yani kei na suka.

“Ni ko sa waki iratou kece na veika au tukuna tiko oqo, e sa na qai tawa e na dua na veleti kava, se kuro lalai, qai mai biu yani me ra veiciriyaki tu e na dua na kuro levu cake sara ka sa buebue tu kina na wai katakata.

“Rawa ni 30 ga na miniti, o sa vueti ira tale mai loma ni kuro, ka ni gauna o ya e ra sa na buta vakavinaka sara tu ga kina,” kaya o Venina.

Kuria na marama yabaki 34 oqo ni gauna e liu e dau saqa vata tu ga na jaina vou yaca, tavioka yaca, kei na suka, ka ra dau vakatoka tu na nodra qase me yacana na lote. Ia, na gauna oqo era sa veisautaka na kena i saqasaqa me bau vakaikanakana no me vaka keitou a tovolea mai e na macawa sa oti.

More Stories