Ciri taudua siga walu

ME da rai lesu tale mada ki na i ka 6 ni siga ni Jiulai, taudonuya na Siga ni Turaga, sa vakacagau na soqo vei ira na wekana e na vanua ni cakacaka kei iratou na tiko mai delaniyavu ka sa vakayacori kina na buruwa bula me vakacagicagitaki kina na nona sa yali tawa macala tiko o Josese Kovea e na vica na siga sa oti.

E talanoataka o Vairusi Seruvatu, yabaki 72, e dua na lewe ni koro o Buliya nira osodrigi na veiwekani e na vanua ni cakacaka e Naveiwakau e Valelevu e na nodra sa mai duavata e na kena lolositaki tiko na bula ni cauravou oqo ka ra sa duavata tale tikoga kina mai delaniyavu.

Ni oti tiko na vakasigalevu sa tauri rawa na i tukutuku ni sa vueti bula o Josese ka sa dua na levu ni marau ka drodro vakayauyau na wainimata ni marau, e talanoataka.

Kuria ka kaya ni sa mani cabori e dua na masu ni vakavinavinaka me vakalesui kina na vakavinavinaka vua na i taukei ni bula na Kalou levu ko Jiova e na vuku ni nona veimaroroi ka veikaroni mai e na eli kei vuravura.

E na siga Vakarauwai na i ka 12 ni Jiulai, e kaya o Seruvatu nira sa maqusa na veiwekani e na koro ni cakacaka e Suva e na kena sa mai vakayacori na i vakamamaca ka ra na kana magiti ni marau.

E malaude na loma ni vakatunuloa e na sigidrigi kei na taura tale vakaivua, e kaya.

Ia, mai na koro o Buliya era sa nanamaki tiko mai na i lakolako lesu yani nei Kovea ka cakacaka voli ga ena dua na otela volekata na yanuyanu o Buliya, na Yaukuve.

Sa ra mani kauti koya lesu tale yani o ira na wekana era tu vakacakacaka ka bau kina na marama tinana, kuria o Seruvatu.

Sa tadu yani na i lakolako ki na matasawa nuku vulavula ena koro o Buliya ka ratou sa maqusa na lewe ni nona i tokatoka e na kena vakarautaki e dua na magiti levu e sega ni taqei rawa.

E vakarautaki kina e dua na vuaka levu ka rauta ni $300 na kena i sau kei na rua tale, 10 na kuro ika lelevu ka qai mai kena i coi tu yani na tavioka ka ai divi ni vanua vakaturaga o Buliya.

E drodro vakayauyau na wanimata ni sa kauti Josese lesu yani na mrama tinana kei iratou na tavalena kei na ganena me vakalesui tale yani vei iratou na tamana ki na i Tokatoka ka vola kawa bula kina, e kaya o Seruvatu.

Tomana ka kaya ni ratou a sa vakarautaka tu na marama mai delaniyavu na nona i vakamamaca me marautaki kina na nona sa lesu bula yani o Kovea.

Era a bau mai vakadinadinataka talega na soqo lagilagi oqo na nona i tokani vakacakacaka e na kabani na Kokomo Yaukuve Island Resort.

E kaya o Seruivatu ni mani sureti talega na turaga ai Talatala e na Tikina o Ono mera bau tiko talega e na soqo qo ka ra mai vakaitavi e na lotu ni vakavinavinaka.

Na wai ni vanua e sega ni tukuni rawa, na sigidrigi kei na taura tale me yacova na kida ni mataka.

E na mataka ni Vakarauwai n ai ka 19 ni Jiulai, e kuria o Seruivatu ka kaya, ni siga e ratou sa qai lomavata na tamana kece sara ka ratou tiko voli mai delaniyavu me sa kerei mada o Josese me mai talanoataka na veika e sotava e na loma ni walu na siga ni nona ciri voli.

E na bati ni tanoa sa qai mai tekivu me rai lesu tale tiko o Kovea ki na i tekitekivu ni nona ciri me yacova mai na nona sa mai dabe tale toka e na loma ni vakatunuloa e na nona delaniyavu.

Me vaka ni vasu tale tikoga o Kovea ki na nona koro dina ga, e ratou a qai vakarautaka na vugona kei ira na lewe ni koro o Buliya e dua na magiti vakaitamera mera marautaka ki na nona sa lesu bula yani.

Kaya o Seruivatu nira sa qai vakarautaka na nona i vakamamaca na vanua ka vasu kina, ka ratou vakasulumi koya yani na lako mai vanua ni cakacaka e na siga Moniti na i ka 21 ni siga.

Ia, e na vale vakavanua, e tinia o Seruivatu, ni vutucoqa e na kena se baci marautaki tale na cauravou qo e na vuku ni nona ciri voli me walu na siga.

Sa mai yala e keri na i talanoa ni nona ciri voli na cauravou ni Buliya oqo e wasawasa me siga walu. E a vueti bula ga mai wasawasa e na liga loloma ni Kalou Levu oqo.

More Stories