Ciqomi na macala

E vakavinavinakataka na i To ni Veisaqa ni sa vakaraitaka tiko na mataivalu ni noda vanua ni ratou na ciqoma na macala ni veidigidigi ni 2018.

Oqo ni oti na nona vakaraitaka ena tabana ni tukutuku o Kanala Jone Kalouniwai ni sa vulica na mataivalu na cala e vakayacora voli mai, me vaka na vuaviri, ka ratou vakadeitaka ni sega ni ratou tiko me veivakarerei ena noda vanua.

E kuria o Kalouniwai, ni lakolako vou e gadreva tiko na i liuliu ni matanitu, oya me na vakamuri vinaka na i tuvatuva ni demorakasi ka sa virikotori tu ka ratou na tutaka talega na Yavu ni Vakavulewa ni 2013.

Kaya o Kalouniwai ni sa lako sivita mai o Viti e dua na gauna ka basika mai kina na vuaviri. Ia e sa segata tikoga na mataivalu na gauna oqo me na toso ki liu ka kerea ki na i To ni Veisaqa me kakua soti ni veitalanoataka eso na i tukutuku e sega ni kauta mai na bula ni toso ki liu.

Ena dua na i tukutuku tabaki enanoa, tukuna o Mosese Bulitavu na lewe ni Palimedi mai na Social Democratic Liberal Party ni sega ni dua na ka eratou saqata tiko kina na mataivalu.

Tukuna talega o Bulitavu ni vaka ga eso na veisoqosoqo vakapolitiki ena noda vanua, e tu kina eso na kena duru kei na lewe ni komiti veiliutaki era sa lewena oti na mataivalu me vaka ga na SODELPA ka sa veiliutaki tiko kina ena gauna oqo o Sitiveni Rabuka.

Vakadeitaka talega o Bulitavu ni vakavinavinakataka na mataivalu ena veiqaravi levu e sa qarava tu ena noda vanua kei na veivanua tani

.E kuria o Bulitavu ni sa dua na i tukutuku rogorogo vinaka ni sa dei ena nodratou i vakarau ni vakasama na mataivalu ena vuku ni veidigidigi kei na kena dau ciqomi na macala ni veidigidigi era sa veidigitaki kina na lewenivanua.

More Stories