Cava ena delana cecere mai rewa

KEIMAMI sa mai vakacavara sara e na dua na uluvanua cecere na veimosoni kece keimami veivosakitaka e na neitou Bose Vakayabaki na Lotu Wesele, e nai Wasewase ko Rewa ena macawa sa oti.
E vakadeitaka mai nai tukutuku oqori ki na Na i Lalakai, nai Talatala Qase ni Wasewase o Rewa o Talatala Autiko Daunakamakama.
Era kaya na turaga i Talatala Qase ni ciwa keca na Tabacakacaka vaka i Talatala e na yasana o Rewa, a ya, na Tabacakacaka ko Lomanikoro, Tabacakacaka o Noco, Tabacakacaka o Naselai, Tabacakacaka o Natogadravu, Tabacakacaka o Nakorovou, Tabacakacaka o Waimaro, Tabacakacaka o Toga kei na Tabacakacaka ko Vuna kei na Tabacakacaka o Tokatoka.
Tomana ni ra a sota vata yani e na koro ko Navatuyaba e na yakavi ni siga Tusiti, e na 2 na kaloko na lewe ni bose, ra cabe e na nodra dui cili e na 3 na kaloko ni bera ni ra qai cabe sara yani ki na nodra i tikotiko na Gone Turaga na Roko Tui Toga e na 5 na kaloko ni bera ni la’ki vakayagataki sara yani na i vakayakavi e na 6 na kaloko.
Oti ga na vakayakavi sa vakayacori sara na lotu ni veikidavaki e na 7 ki na 8 na kaloko ni bera ni ra qai vakacegu yani na lewe ni bose ena yakavi ni Tusiti.
Ni oti ga na katalau e na mataka ni Vukelulu sa golevi sara kina na i matai ni bose na Bose vaka i Talatala kei na Vada ni Turaga ka ratou rairai talega kina e lewe 7 na cauravou i Vakatawa ka ratou sasaga cake tiko e na cavuti vaka i Talatala e na loma ni lotu, ka vaka talega kina e dua na Vada ni Turaga.
“E tolu tiko na kena i wasewase, o ya na, cavuti vaka i Vakatawa, na i Vakatawa vakatovolei kei na i Vakatawa yaco.
“Ni qai rauta na 11 na kaloko e na siga Vukelulu sa mai vakacagau ka sa vakayacori talega na i matai ni bose na Bose Vakaitalatala,” kaya o Talatala Qase Daunakamakama
Tomana ni tekivuna na lotu e na mataka lailai ni siga o ya mai vua na gone yalewa ka vakavakarau tiko ki na i cavuti vaka Vada ni Turaga, ka soli i vaqa vakayalo kina na i Talatala ni Tabacakacaka ko Naselai kei iratou nai Talatala e na loma ni Tabacakacaka e 8 e na Wasewase o Rewa.
Ni oti mai na kena qaravi na sakaramede, sa tekivu sara na katalau e na 6 na kaloko, ka la’ki cava e na 7 na kaloko ni bera ni qai sema tale yani na i tuvatuva ni bose mai na 8 ena mataka me yacova sara yani na yakavi.
Oti oya e sa qai mai vakayacori e dua na lotu e na yakavi ni bera ni keimami qai lesu tale ki na neimami dui cili.
E kaya o Talatala Qase ni siga Lotulevu e vakamuri ga mai na i tuvatuva ni lotu ka vakayacori mai e na siga Vukelulu, ka ra sa gole talega na cauravou kei na goneyalewa me ra la’ki veitarogi e na koronivuli ni Tikina o Toga e na siga oya, ka na qai la’ki vakacavari tiko e na siga Vakaraubuka, ka veitauri tiko kina vei ira na i vukevuke ni Principala mai na Lelean Memorial School.
“E 6 kece na pepa ni veitarogi era dabeca, ka yatolu tiko na auwa, dua na pepa.
“Na gauna sara ga oqo e sa mai cava kina na i otioti ni mosoni ka vakaturi mai e na gauna ni bose, ka sa macala talega kina na Bose ni Yasana o Rewa e na yabaki mai oqo, 2019 ni sa ratou bole tiko na Tabacakacaka ko Natogadravu, me na la;ki vakayacori ki vei iratou,” kaya o Talatala Qase.
Ni oti ga na vakasigalevu e na siga Lotulevu, era sa cabe tale na lewe ni Bose ni Yasana ko Rewa ki na valenisoqo e na koro ko Navatuyaba me ra la’ki vakacabora kina na nodra ka ni vakavinavinaka ki na vanua ko Toga Naqavoka, e na vuku ni kena qaravi kina na bose ni Wasewase o Rewa.
E na yakavi talega ni siga Lotulevu era sa yacoyaco yani kina na vei Tabacakacaka vaka i Talatala e na Wasewase o Rewa, me ra la’ki lagalaga sere e na bogi oya, ka ra la’ki sikovi ira talega na lewe ni bose e na ndra dui i cili.
Sa vakavinavinaka sara vakalevu nai Talatala Qase ni Wasewase o Rewa ki na vanua ko Toga Naqavoka e na nodra veitauriliga taka na veiqaravi lagilagi era se qai bau sotava vakadua, ka ra biuta vakatikitiki na veimatalotu era lewena, e na nodra ligaiduataka na nodra qaravi na lewe ni Bose Vakayabaki ni Wasewase o Rewa, ka ra veisukayaki tiko e na siga Vakaraubuka ni macawa sa oti.
Sa nona masu na i Talatala Qase me na sobuta yadudua na nodra dui matavuvale, ka me vakatawana na nodra i lololo na Tikina o Toga Naqavoka na loloma levu mai vua na DauniLewa.
Sa koto oqori e ra na yacadra na i Vakatawa, ka ra sa na lesi tiko ki na nodra Tabacakacaka vou e na yabaki mai oqo: Dona Takalaiyale, Tabacakacaka Vakaivakatawa, Naivurevue. Sailia Mavileko, Tabacakacaka Vakaivakatawa, Coloisuva. Manasa Tau, Tabacakacaka Vakaivakatawa, Sawani. Tevita Waqa, Tabacakacaka Vakaivakatawa, Navatuyaba. Vereimi Valevoro Tabacakacaka Vakaivakatawa, Naulu. Sosiceni Navilo, Tabacakacaka Vakaivakatawa, Muana. Josua Balemilo, Tabacakacaka Vakaivakatawa, Vunisei. Yalo Vaqiri, Tabacakacaka Vakaivakatawa, Naibatisuli. Ratu Vuki Waqa, Tabacakacaka Vakaivakatawa, Lomainasau. Jekope Serukalou, Tabacakacaka Vakaivakatawa, Bure Noco. Amani Tuimalaise, Tabacakacaka Vakaivakatawa, Saika.

More Stories