Cabe ni rarama e Nakorotubu

NI VAKAYACORI oti na lotu ni kena ciqomi na cina mai na koro ko Dama ena Tikina ko Nakorotubu, e sa qai laki cereki na i vakananumi ka tara koto ga e na yasa ni valenilotu e na i curucuru mai na kubu ira, ka volai sara tu kina vakamatau na kena cabeta mai na noda vanua na rarama.

E kaya o Dikonesi Unaisi Matawalu ni vakasama oqo era bucina ga na lewe ni Lotu Wesele me veitaudonui kei na gauna e yacova mai kina na nodratou koro na kena taubaletaki mai na cina ni rarama.

Era sureti talega na Turaga Na Tui Viwa vata kei ira na nona lewe ni Yavusa me nodratou vulagi e na soqo lagilagi oya.

Oqo na i sema ni veiwekani ni nodratou tikina o Nakorotubu kei na yanuyanu vakaturaga o Viwa e se dei vinaka tu ga me yacova mai na gauna nikua.

Na kena i vakadinadina ga ni tiko na nodratou mata ni katuba (veimataki) e Nakorotubu, ka tiko talega na neitou mata ni katuba e Viwa e kaya.

E na nona dolea na vosa ni veikidavaki o Ratu Savenaca Komaisavai, e kaya ni ratou vakavinavinakataki ratou na wekadratou e Nakorotubu ena vuku ni nodratou nanumi, ka ratou sa sureti ira talega na lewe i Nakorotubu me ra gole yani e na kena laki vakananumi na cabe ni lotu e na nodratou yanuyanu e na vula ko Okotova ni yabaki ga oqo.

E volai koto e na i vakananumi ni cabe ni Rarama oya e na i matai ni senitiuri e a cabe kina na Rarama kei Vuraura – Na i ka 17 ni senitiuri e a cadra kina o Jone Wesele mai Peritania – Na i ka 19 ni senitiuri e a cabe kina na rarama mai Lakeba, Lau, mai Viwa kei Nayavutoka Nakorotubu, Ra.

Ia, e a qai vakavoui na Yasana o Ra e na Jiupili Koula ni Koniferedi ni Lotu Wesele e Dama e na siga Vakarauwai nai ka 9 ni siga ni vula ga oqo. E kaya o Matawalu ni dina ni qai vakayacori na soqo levu e na Siga Tabu, ia, e ratou sa na kidavaka rawa mada ga na nodratou i vakananumi e na siga Vakarauwai sa oti.

More Stories