Bula ni vakavakarau

Update: 10:36AM ESA roro voleka mai na vula ni cagilaba e Viti, oya mai na Noveba ki na vula o Evereli.

Eda kila deivaki talega ni levu sara vei ira na wekada ena veiyasai Viti era se vakaitikotiko ena nodra vale laca kei na vale era sa tara ga vakai ira ena kau kei na kava era sa volia rawa se lolomataka na matanitu.

E dua talega na ka me na kilai deivaki ni sega ni cakacaka rawarawa na kena vakayacori na veivakacokotaki ni oti e dua na cagilaba kaukauwa me vakataki Winston, ka cagilaba kaukauwa ena wase ni vuravura oqo.

E vakadeitaka mai na Vunivola Tudei ni Bula Raraba o Doketa Jo Koroivueta ni sa vakayagataka oti na matanitu e $86 na milioni ena kena cokonaki e rauta ni 23,000 na vuvale era tiko e Taveuni, Ra, Vualiku kei Tailevu kei na veivanua e ravuravu kina na cagilaba oqo.

Tukuna talega o Vuniwai Koroivueta ni qai laurai ni rauta ni 10,000 tale na vuvale era gadreva talega na veivuke ni veivakacokotaki ni sa oti na i matai ni wasewase ni vakasokumuni tukutuku ni kere veivuke.

E kaya talega ni sega ni ka rawarawa na kena laurai me da sa vukei ga ena dua na gauna na udolu vakaudolu na lewei Viti.

E qai ka ni kidacala talega vei i ratou na kabani tara vale na levu ni gagadre e ratou ciqoma ni oti ga na cagilaba ena vula o Veverueri.

 E sa qai waraki tale tu na kena otataki mai valagi na kau ni vale, ena kena sega ni veirauti na kau ni vale e volitaki e na veitabana ni bisinisi ni tara vale ena noda vanua.

 E da na kauwai tiko ena vuku ni gagadre kei na tagi kei na lomaleqa era lako curuma tu e vuqa sara na vuvale e Viti ena vuku ni vula ni cagilaba esa roro mai oqo.

E dua talega na vula osooso ka dredre vei ira na luveda ni ra na dabeca tiko kina na nodra veitarogi lelevu, na Fomu 4, Fomu 7 kei na Fomu 6.

Eda sa na veitokoni ga ena masu kei na vakanuinui ni ra na qarava sara vakavinaka na nodra veitarogi ena vula o oveba.

 Ni sebera mai na vula o Noveba e na dauma ka meda na vakavakarau toka ga ni se siga toka.

 Meda na vakarautaka vakavinaka na noda bula, na veika e dodonu me ra na cokonaki kina na lewe ni vuvale.

 Na veika e dodonu mera na kila na luveda ni yaco e dua na leqa tubu koso, e dodonu me ra sa na tuberi ka vakavulici kina.

 E sa ka bibi na vakavakarau vinaka. Me kua ni qai yaco e dua na leqa, eda qai vakayacora e dua na ka, esa bera ni sa kasova na sucu.

 Na matanitu e sa na tomana tikoga na nona veiqaravi ena kena vukei na lewenivanua taucoko sara. Sega walega ni dua na yasana, se dua na i tikotiko, ena sagai meda na tarai taucoko yani na lewei Viti raraba.

 Ka sa tu na vakanuinui ni ra na lomani tiko na wekada kei na veivuvale era gadreva dina tu na veivuke me baleta na nodra vakavaletaki vakavinaka ka me ra kila ni ra kauwaitaki.

More Stories